ചെന്നൈ: ഡിറ്റ് വാ ചുഴലിക്കാറ്റിനെ തുടർന്ന് തമിഴ്‌നാട്ടിൽ മൂന്ന് പേർ മരിച്ചു. സംസ്ഥാനത്തെ ഡെൽറ്റ ജില്ലകളിൽ കനത്ത മഴയിൽ വ്യാപകമായ കൃഷിനാശമാണ് റിപ്പോർട്ട് ചെയ്യുന്നത്. ചെന്നൈ അടക്കമുള്ള വടക്കൻ ജില്ലകളിൽ നാളെ രാവിലെ വരെ മഴ തുടരുമെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു.(Cyclone Ditwah, 3 people died in Tamil Nadu)
ചുഴലിക്കാറ്റിനെ തുടർന്നുള്ള മഴയിൽ വീടുകളുടെ ചുവരിടിഞ്ഞ് വീണാണ് രണ്ടുപേർ മരിച്ചത്. തഞ്ചാവൂരിൽ അച്ഛനമ്മമാർക്കും സഹോദരിക്കുമൊപ്പം കിടന്നുറങ്ങുകയായിരുന്ന രേണുക ദേവി (20) എന്ന യുവതിയാണ് വീടിന്റെ ചുവരിടിഞ്ഞ് വീണ് മരിച്ചത്. തൂത്തുക്കുടിയിലും സമാനമായ അപകടത്തിൽ ഒരാൾ മരിച്ചു.
മയിലാടുതുറയിൽ കടയിൽ നിന്ന് വീട്ടിലേക്ക് മടങ്ങുന്നതിനിടെ പ്രതാപ് എന്ന യുവാവ് പൊട്ടിവീണ വൈദ്യുതി കമ്പിയിൽ തട്ടി മരിച്ചു. തമിഴ്‌നാട് റവന്യൂമന്ത്രിയുടെ കണക്കുകൾ പ്രകാരം, 150-ലേറെ കന്നുകാലികൾ ചത്തതായും 234 വീടുകൾ തകർന്നതായും റിപ്പോർട്ട് ചെയ്തിട്ടുണ്ട്.
നാഗപ്പട്ടണത്തും മയിലാടുതുറൈയിലും രാമനാഥപുരത്തും ആയിരത്തിലേറെ ഹെക്ടർ കൃഷിഭൂമിയിൽ വെള്ളം കയറി. പുതുച്ചേരിയിൽ മഴയും കാറ്റും ശക്തമായതോടെ ബീച്ചുകളിൽ നിന്ന് ആളുകളെ മാറ്റിപ്പാർപ്പിച്ചു. ശ്രീലങ്കയിലേക്കുള്ള വിമാനങ്ങൾ ഉൾപ്പെടെ ചെന്നൈയിൽ നിന്നുള്ള 50-ലധികം സർവീസുകൾ റദ്ദാക്കിയിരുന്നു.
ശ്രീലങ്ക വിട്ട് ഇന്ത്യൻ തീരത്തോട് അടുക്കുമ്പോഴേക്കും ദുർബലമായ ഡിറ്റ് വാ വൈകീട്ടോടെ അതിതീവ്ര ന്യൂനമർദ്ദമാകുമെന്നാണ് നിലവിലെ പ്രവചനം. വടക്കൻ തമിഴ്‌നാട് തീരത്ത് നിന്ന് 25 മുതൽ 50 കിലോമീറ്റർ അകലെയായി ബംഗാൾ ഉൾക്കടലിലൂടെ ആന്ധ്രാ തീരത്തേക്ക് ഡിറ്റ് വാ നീങ്ങും. പ്രളയക്കെടുതിയിൽ വലയുന്ന ശ്രീലങ്കയ്ക്ക് ഇന്ത്യ അകമഴിഞ്ഞ സഹായവുമായി രംഗത്തെത്തിയിരുന്നു.
വിവിധ ഇടങ്ങളിൽ കുടുങ്ങിയ നിരവധി പേരെ ഇന്ത്യൻ നാവികസേനയുടെ ഹെലികോപ്റ്ററുകൾ രക്ഷപ്പെടുത്തി. വിമാനവാഹിനിക്കപ്പലായ ഐ.എൻ.എസ്. വിക്രാന്തിൽ നിന്നുള്ള ഹെലികോപ്റ്ററുകൾ ഉൾപ്പെടെ രക്ഷാപ്രവർത്തനങ്ങളിൽ സജീവമായിരുന്നു.