ന്യൂഡൽഹി: ഡൽഹി ചെങ്കോട്ടയ്ക്ക് സമീപം നടന്ന സ്ഫോടനത്തിനു മുൻപുള്ള ചാവേറായ ഉമർ നബിയുടെ വീഡിയോ ദൃശ്യങ്ങൾ പുറത്തുവന്നു. ഭീകരാക്രമണത്തിന് ഏതാനും ദിവസങ്ങൾക്ക് മുൻപ് റെക്കോർഡ് ചെയ്യപ്പെട്ടതാണ് ഇംഗ്ലീഷിലുള്ള ഈ വീഡിയോ. ചാവേർ ആക്രമണത്തെ പൂർണ്ണമായും ന്യായീകരിച്ചുകൊണ്ടാണ് ഉമർ നബി സംസാരിക്കുന്നത്.(Controversial video of Delhi blast suicide bomber Umar justifying suicide attack)
ചാവേർ ആക്രമണം എന്ന ആശയം വളരെ തെറ്റിദ്ധരിക്കപ്പെട്ടതാണെന്നും, ഇത് യഥാർത്ഥത്തിൽ ഒരു രക്തസാക്ഷിത്വ പ്രവർത്തനം കൂടിയാണെന്നും അദ്ദേഹം അവകാശപ്പെടുന്നു. "ചാവേർ ആക്രമണം സംബന്ധിച്ച് നിരവധി വാദങ്ങളും വൈരുധ്യങ്ങളും ഉയർന്നുവന്നിട്ടുണ്ട്. ഒരു വ്യക്തി ഒരു പ്രത്യേക സ്ഥലത്ത് ഒരു പ്രത്യേക സമയത്ത് മരിക്കുമെന്ന് അനുമാനിക്കുന്നതിനെയാണ് രക്തസാക്ഷിത്വ പ്രവർത്തനം എന്ന് പറയുന്നത്," ഉമർ നബി വീഡിയോയിൽ പറയുന്നു. ഭീകരാക്രമണത്തിന്റെ ഗൂഢാലോചന സംബന്ധിച്ച് എൻ.ഐ.എ. അന്വേഷണം തുടരുന്നതിനിടെയാണ് ഈ വീഡിയോ പുറത്തുവന്നത്.
ഭീകരതയ്‌ക്കെതിരെ സമൂഹ പങ്കാളിത്തം ശക്തമാക്കുന്നതിന്റെ ഭാഗമായി നിർണ്ണായക വിവരങ്ങൾ നൽകുന്നവർക്ക് വൻ തുക പാരിതോഷികം പ്രഖ്യാപിച്ച് ജമ്മു കശ്മീർ പോലീസ്. വിശ്വസനീയവും കൃത്യവുമായ വിവരങ്ങൾ നൽകുന്നവർക്ക് 5 ലക്ഷം രൂപ പാരിതോഷികം നൽകാനാണ് തീരുമാനം.
2021 മുതൽ ഭീകരവാദ പ്രവർത്തനങ്ങളുടെ കേന്ദ്രബിന്ദുവായ അതിർത്തി ജില്ലയായ പൂഞ്ചിൽ ആണ് ആദ്യ ഘട്ടത്തിൽ ഈ പദ്ധതി നടപ്പാക്കുക. വിവരം നൽകുന്നവരുടെ ഐഡന്റിറ്റി തികച്ചും രഹസ്യമായി സൂക്ഷിക്കുമെന്നും ജമ്മു കശ്മീർ പോലീസ് അറിയിച്ചു.
ഭീകരവാദികൾക്ക് സഹായം നൽകുന്നവരെക്കുറിച്ചുള്ള വിവരങ്ങൾ നൽകാൻ പോലീസ് പൊതുജനങ്ങളോട് അഭ്യർത്ഥിച്ചു. ഭീകരർക്ക് ഭക്ഷണം, പാർപ്പിടം, അവശ്യവസ്തുക്കൾ എന്നിവ വിതരണം ചെയ്യുന്ന വ്യക്തികൾ, ഗതാഗത സൗകര്യം അല്ലെങ്കിൽ സുരക്ഷിതമായ വീടുകൾ നൽകുന്നവർ, തീവ്രവാദികളുമായി ആശയവിനിമയം നിലനിർത്തുന്നവർ, സുരക്ഷാ സേനയുടെ നീക്കങ്ങളെക്കുറിച്ച് രഹസ്യ വിവരങ്ങൾ കൈമാറുന്നവർ, ഭീകര പ്രവർത്തനങ്ങൾക്കുള്ള ധനസഹായം, റിക്രൂട്ട്‌മെന്റ്, നെറ്റ്‌വർക്കിംഗ് എന്നിവ നടത്തുന്നവർ എന്നിവരാണിവർ. ഈ നീക്കം പ്രാദേശികമായി ഭീകരവാദ പ്രവർത്തനങ്ങൾ തടയുന്നതിൽ നിർണായകമാകും എന്നാണ് വിലയിരുത്തൽ.
സ്ഫോടനവുമായി ബന്ധപ്പെട്ട് കൂടുതൽ ഞെട്ടിപ്പിക്കുന്ന വിവരങ്ങൾ ദേശീയ അന്വേഷണ ഏജൻസി (എൻഐഎ) പുറത്തുവിട്ടു. ഭീകരർ ഹമാസ് മാതൃകയിലുള്ള ഡ്രോൺ ആക്രമണത്തിനാണ് പദ്ധതിയിട്ടിരുന്നതെന്നാണ് പുതിയ റിപ്പോർട്ട്. ആക്രമണത്തിനായി ഡ്രോണുകളും ചെറിയ റോക്കറ്റുകളും നിർമ്മിക്കാൻ ഗൂഢാലോചന നടന്നതിന് അന്വേഷണ ഏജൻസികൾക്ക് തെളിവ് ലഭിച്ചിട്ടുണ്ട്.
ചാവേറായ ഉമർ, ഷൂസിൽ ബോംബ് പൊട്ടിക്കാനുള്ള ട്രിഗർ ഘടിപ്പിച്ചിരുന്നോ എന്നതിനെക്കുറിച്ചും എൻഐഎ അന്വേഷിക്കുന്നുണ്ട്. കേസുമായി ബന്ധപ്പെട്ട് എൻഐഎ കൂടുതൽ അറസ്റ്റുകളിലേക്ക് കടന്നിരിക്കുകയാണ്. ഇന്നലെ കശ്മീർ സ്വദേശികളായ രണ്ട് പേർ അറസ്റ്റിലായി.
ജസീർ ബീലാൽ വാണി (ഡാനിഷ്) ഡ്രോണുകളിൽ രൂപമാറ്റം വരുത്തി റോക്കറ്റ് ആക്രമണത്തിനുള്ള സാങ്കേതിക സഹായം നൽകി. ഡ്രോണുകളും റോക്കറ്റുകളും ഉപയോഗിച്ച് ആക്രമണം നടത്താൻ ഇയാൾ പദ്ധതി തയ്യാറാക്കിയതായും എൻഐഎ അന്വേഷണത്തിൽ കണ്ടെത്തിയിട്ടുണ്ട്. ശ്രീനഗറിൽ നിന്നാണ് ഇയാളെ അറസ്റ്റ് ചെയ്തത്.
ഡോക്ടർ ഷഹീൻ ഷാഹിദ് എന്ന അറസ്റ്റിലായ വനിതാ ഡോക്ടർക്ക് ഭീകര സംഘടനയായ ലഷ്കർ എ തയ്ബയുമായി അടുത്ത ബന്ധമുണ്ടെന്നാണ് കണ്ടെത്തൽ. നേരത്തെ അറസ്റ്റിലായ ഷഹീൻ രണ്ട് വർഷം സൗദി അറേബ്യയിൽ കഴിഞ്ഞിരുന്നതായും തുർക്കിക്ക് പുറമെ മാൽദ്വീപിലേക്കും യാത്ര ചെയ്തിരുന്നതായും വിവരമുണ്ട്.
നേരത്തെ അറസ്റ്റിലായ അമീർ റാഷിദ് അലിയെ കോടതി പത്തു ദിവസത്തേക്ക് എൻഐഎ കസ്റ്റഡിയിൽ വിട്ടിരിക്കുകയാണ്. കൂടുതൽ തെളിവുകൾ ശേഖരിക്കുന്നതിനായി ഇയാളെ കശ്മീരിലെത്തിച്ച് വിശദമായ അന്വേഷണം നടത്തും.
ചെങ്കോട്ട സ്ഫോടനത്തിൽ മരിച്ചവരുടെ എണ്ണം 15 ആയി ഉയർന്നു. ഗുരുതരമായി പരുക്കേറ്റ് ചികിത്സയിലായിരുന്ന ലുക്മാൻ, വിനയ് പഥക് എന്നിവരാണ് കഴിഞ്ഞ ദിവസം മരിച്ചത്. രാജ്യത്തെ നടുക്കിയ ഭീകരാക്രമണത്തിന്റെ ഗൂഢാലോചന സംബന്ധിച്ച നിർണായക വിവരങ്ങളാണ് പുറത്തുവരുന്നത്. സംഭവത്തിന് പിന്നിൽ പ്രവർത്തിച്ച മുഴുവൻ കണ്ണികളെയും കണ്ടെത്താനുള്ള തീവ്ര ശ്രമത്തിലാണ് എൻഐഎ സംഘം.