ന്യൂഡൽഹി: പുതുവർഷ ദിനത്തിൽ രാജ്യത്ത് വാണിജ്യ പാചകവാതക സിലിണ്ടറുകളുടെ വില കുത്തനെ കൂട്ടി. 19 കിലോയുടെ വാണിജ്യ സിലിണ്ടറുകൾക്ക് 111 രൂപയാണ് വർദ്ധിപ്പിച്ചത്. പുതുക്കിയ വില ജനുവരി 1 മുതൽ പ്രാബല്യത്തിൽ വന്നു. അതേസമയം, വീടുകളിൽ ഉപയോഗിക്കുന്ന 14 കിലോ ഗാർഹിക സിലിണ്ടറുകളുടെ വിലയിൽ മാറ്റമില്ല.(Commercial LPG cylinder price increased by Rs. 111 in New Year)
കേരളത്തിൽ ഇന്നത്തെ വില 1719 രൂപ ആണ്. ഡൽഹിയിൽ 1580.50 രൂപയിൽ നിന്ന് 1691.50 രൂപയായി ഉയർന്നു. രാജ്യത്തെ ഏറ്റവും ഉയർന്ന നിരക്ക് ചെന്നൈയിലാണ്; 1739.5 രൂപയിൽ നിന്ന് 1849.50 രൂപയായി. മുംബൈയിൽ 1531.50 രൂപയിൽ നിന്ന് 1642.50 രൂപയായി. കൊൽക്കത്തയിൽ 1684 രൂപയിൽ നിന്ന് 1795 രൂപയായി.
ഡിസംബർ ഒന്നിന് വാണിജ്യ സിലിണ്ടറുകൾക്ക് പത്ത് രൂപയോളം കുറച്ചിരുന്നെങ്കിലും, പുതുവർഷത്തിൽ 111 രൂപയുടെ കുത്തനെയുള്ള വർദ്ധനവ് ഹോട്ടൽ, റെസ്റ്റോറന്റ് മേഖലകളെ സാരമായി ബാധിക്കും. വാണിജ്യ സിലിണ്ടറുകളുടെ വില കൂടുമ്പോഴും സാധാരണക്കാർക്ക് ആശ്വാസമായി ഗാർഹിക സിലിണ്ടറുകളുടെ വിലയിൽ മാറ്റം വരുത്തിയിട്ടില്ല.