ബെംഗളൂരു: കർണാടക കോൺഗ്രസിനെ ഉലച്ച മുഖ്യമന്ത്രി പദവി കൈമാറ്റ തർക്കത്തിൽ താൽക്കാലിക സമവായം. 2028-ലെ അടുത്ത നിയമസഭാ തിരഞ്ഞെടുപ്പ് വരെ സിദ്ധരാമയ്യ തന്നെ മുഖ്യമന്ത്രിയായി തുടരും. അടുത്ത തിരഞ്ഞെടുപ്പിൽ ഡി.കെ. ശിവകുമാറിനെ മുഖ്യമന്ത്രി സ്ഥാനത്തേക്ക് ഉയർത്തിക്കാട്ടും എന്ന് സിദ്ധരാമയ്യ ഉറപ്പ് നൽകിയതോടെയാണ് എ.ഐ.സി.സി. വൃത്തങ്ങൾ തർക്കത്തിന് പരിഹാരം കണ്ടത്. നിലവിലെ കാലാവധി പൂർത്തിയാക്കാൻ സിദ്ധരാമയ്യക്ക് ഡി.കെ. ശിവകുമാർ സമ്മതം നൽകിയതായി ഹൈക്കമാൻഡ് അറിയിച്ചു.(Clash in Karnataka ends, Siddaramaiah to continue till 2028)
മന്ത്രിസഭാ രൂപീകരണ സമയത്ത് ആദ്യ രണ്ടര വർഷം സിദ്ധരാമയ്യയും പിന്നീട് ഡി.കെ. ശിവകുമാറും മുഖ്യമന്ത്രിയാകുമെന്നായിരുന്നു ധാരണ. രണ്ടര വർഷം പൂർത്തിയായിട്ടും സിദ്ധരാമയ്യ തുടർന്നത് ഡി.കെ. അനുകൂലികളിൽ അതൃപ്തി ഉണ്ടാക്കിയിരുന്നു. ഹൈക്കമാൻഡിന്റെ നിർദ്ദേശപ്രകാരം ഇന്നലെ നടന്ന പ്രാതൽ ചർച്ചയിലാണ് സിദ്ധരാമയ്യ കാലാവധി പൂർത്തിയാക്കാനുള്ള അവസരം നേടിയത്. അടുത്ത തിരഞ്ഞെടുപ്പിൽ ഡി.കെ. തന്നെ മുഖമായിരിക്കുമെന്ന് ഈ ചർച്ചയ്ക്കിടെ സിദ്ധരാമയ്യ ഉറപ്പുനൽകി.
എം.എൽ.എമാരുമായി സംസാരിച്ച ഹൈക്കമാൻഡ്, സിദ്ധരാമയ്യക്ക് തന്നെയാണ് ഭൂരിപക്ഷ പിന്തുണയെന്ന് ഉറപ്പിച്ച ശേഷമാണ് ഈ വിവരം ശിവകുമാറിനെ ധരിപ്പിച്ചത്. ഇതോടെ ശിവകുമാറും സമവായത്തിന് വഴങ്ങുകയായിരുന്നു. കെ.സി. വേണുഗോപാലിന്റെ നിർദ്ദേശപ്രകാരമായിരുന്നു ചർച്ച. തങ്ങൾ ഒറ്റക്കെട്ടാണെന്നും അഭിപ്രായവ്യത്യാസങ്ങൾ ഇല്ലായിരുന്നുവെന്നും ഇരു നേതാക്കളും സംയുക്ത വാർത്താസമ്മേളനത്തിൽ വ്യക്തമാക്കി.
ഡിസംബർ എട്ടിന് തുടങ്ങാനിരിക്കുന്ന കർണാടക നിയമസഭയുടെ ശീതകാല സമ്മേളനത്തിന് മുമ്പ് പ്രതിപക്ഷത്തിന് അനാവശ്യ ആയുധം നൽകരുത് എന്ന ഹൈക്കമാൻഡിന്റെ നിർദ്ദേശം ഇരു നേതാക്കളും അംഗീകരിച്ചു. മുഖ്യമന്ത്രി പദവി കൈമാറ്റവുമായി ബന്ധപ്പെട്ട ചർച്ചകളോ പരസ്യമായ അഭിപ്രായ പ്രകടനങ്ങളോ അടുത്തമാസം എട്ടിന് തുടങ്ങുന്ന ശീതകാല സമ്മേളനം പൂർത്തിയാകും വരെ ഉണ്ടാകില്ലെന്ന് ഉറപ്പിച്ചു.
അനാവശ്യ പ്രസ്താവനകളോ സാമൂഹിക മാധ്യമങ്ങൾ വഴിയുള്ള ഒളിപ്പോരുകളോ നേതാക്കളുടെ ഡൽഹി യാത്രയോ തൽക്കാലം ഉണ്ടാകില്ലെന്നും തീരുമാനിച്ചു. പ്രധാനമന്ത്രിയാകാൻ കഴിയുമായിരുന്നിട്ടും സോണിയാ ഗാന്ധി പാർട്ടിക്ക് വേണ്ടി ത്യാഗം ചെയ്തതിനെക്കുറിച്ച് ഡി.കെ. ശിവകുമാർ ഒരു പ്രസംഗത്തിൽ സൂചിപ്പിച്ചത് സമവായ നീക്കത്തിന്റെ സൂചനയായി രാഷ്ട്രീയ നിരീക്ഷകർ വിലയിരുത്തിയിരുന്നു.