ന്യൂഡൽഹി: ക്രിസ്മസ്, പുതുവത്സര ആഘോഷങ്ങൾക്കായി രാജ്യത്തെ വിവിധ സംസ്ഥാന സർക്കാരുകൾ സ്കൂൾ അവധി പട്ടിക പുറത്തിറക്കി. കേരളം ഉൾപ്പെടെയുള്ള ദക്ഷിണേന്ത്യൻ സംസ്ഥാനങ്ങളിലും ഉത്തരേന്ത്യൻ സംസ്ഥാനങ്ങളിലും വ്യത്യസ്തമായ അവധി ക്രമീകരണങ്ങളാണ് ഏർപ്പെടുത്തിയിരിക്കുന്നത്.(Christmas - New Year holidays, 10 days in Kerala, schools will remain open in UP)
കേരളത്തിൽ ഡിസംബർ 24-ന് സ്കൂളുകൾ അടയ്ക്കും. ജനുവരി 5 വരെ നീളുന്ന 10 ദിവസത്തെ അവധിക്ക് ശേഷം ജനുവരി 6-ന് സ്കൂളുകൾ വീണ്ടും തുറക്കും. രാജ്യത്ത് ഏറ്റവും കൂടുതൽ ദിവസം അവധി പ്രഖ്യാപിച്ചിരിക്കുന്നത് പഞ്ചാബിലാണ്. ഡിസംബർ 22 മുതൽ ജനുവരി 10 വരെയാണ് ഇവിടെ ശൈത്യകാല അവധി.
രാജസ്ഥാനിൽ ഡിസംബർ 25 മുതൽ ജനുവരി 5 വരെയാണ് ശൈത്യകാല അവധി പ്രഖ്യാപിച്ചിരിക്കുന്നത്. ഡൽഹിയിൽ ഡിസംബർ 25 പൊതുഅവധിയാണ്. ഡിസംബർ 24 നിയന്ത്രിത അവധിയായതിനാൽ സ്കൂൾ പ്രവർത്തിക്കുന്ന കാര്യത്തിൽ അതത് സ്ഥാപനങ്ങൾക്ക് തീരുമാനമെടുക്കാം. ഹരിയാനയിൽ ഡിസംബർ 25-ന് മാത്രം അവധി. ശൈത്യകാല അവധി പിന്നീട് പ്രഖ്യാപിക്കും.
തെലങ്കായിൽ മിഷനറി/ക്രിസ്ത്യൻ മൈനോറിറ്റി സ്കൂളുകൾക്ക് ഡിസംബർ 23 മുതൽ 27 വരെ അവധിയുണ്ട്. സർക്കാർ സ്കൂളുകൾക്ക് ഡിസംബർ 25-ന് മാത്രമാണ് അവധി. മറ്റ് സംസ്ഥാനങ്ങളിൽ നിന്ന് വ്യത്യസ്തമായി ഉത്തർപ്രദേശിൽ ഡിസംബർ 25-ന് സ്കൂളുകൾ പ്രവർത്തിക്കും. മുൻ പ്രധാനമന്ത്രി അടൽ ബിഹാരി വാജ്പേയിയുടെ ജന്മശതാബ്ദി ആഘോഷങ്ങളുടെ സമാപനത്തോടനുബന്ധിച്ച് പ്രത്യേക പരിപാടികൾ സംഘടിപ്പിക്കാനാണ് സർക്കാർ തീരുമാനം. ഈ പരിപാടികളിൽ വിദ്യാർത്ഥികളുടെ സാന്നിധ്യം നിർബന്ധമാക്കിയിട്ടുണ്ട്.
ഓരോ സംസ്ഥാനത്തെയും വിദ്യാഭ്യാസ വകുപ്പുകൾ പുറപ്പെടുവിക്കുന്ന കൃത്യമായ സർക്കുലറുകൾ പരിശോധിക്കണമെന്നും പ്രാദേശികമായ മാറ്റങ്ങൾ ഉണ്ടാകാമെന്നും അധികൃതർ അറിയിച്ചു. ആന്ധ്രപ്രദേശിലെ ഔദ്യോഗിക വിജ്ഞാപനം ഉടൻ പുറത്തിറങ്ങും.