ന്യൂഡൽഹി : ദലൈലാമയുടെ 90-ാം ജന്മദിനത്തിൽ പ്രധാനമന്ത്രി നരേന്ദ്ര മോദി ആശംസകൾ നേർന്നതിലും ആഘോഷങ്ങളിൽ ഇന്ത്യൻ ഉദ്യോഗസ്ഥർ പങ്കെടുത്തതിലും പ്രതിഷേധിച്ച് ചൈന. ടിബറ്റുമായി ബന്ധപ്പെട്ട വിഷയങ്ങളിൽ ചൈനയുടെ സംവേദനക്ഷമതയെ ഇന്ത്യ പൂർണ്ണമായും വിലമതിക്കണമെന്ന് അവർ പറഞ്ഞു.(China protests to India over PM Modi’s greetings to Dalai Lama on his birthday)
ടിബറ്റുമായി ബന്ധപ്പെട്ട കാര്യങ്ങളിൽ ചൈനയുടെ നിലപാട് സ്ഥിരതയുള്ളതും വ്യക്തവുമാണ് എന്നും, അത് എല്ലാവർക്കും അറിയാമെന്നും ചൈനീസ് വിദേശകാര്യ മന്ത്രാലയ വക്താവ് മാവോ നിംഗ് ചൂണ്ടിക്കാട്ടി. ദലൈലാമയുടെ 90-ാം ജന്മദിനത്തിൽ പ്രധാനമന്ത്രി നരേന്ദ്രമോദി ആശംസകൾ നേർന്നതിനെക്കുറിച്ചും ജന്മദിനാഘോഷങ്ങളിൽ മുതിർന്ന ഇന്ത്യൻ ഉദ്യോഗസ്ഥരുടെ സാന്നിധ്യത്തെക്കുറിച്ചുമുള്ള ചോദ്യത്തിന് മറുപടി നൽകുകയായിരുന്നു മാവോ.
14-ാമത് ദലൈലാമ ഒരു രാഷ്ട്രീയ പ്രവാസിയാണ് എന്നും, വളരെക്കാലമായി വിഘടനവാദ പ്രവർത്തനങ്ങളിൽ ഏർപ്പെട്ടിരിക്കുകയും മതത്തിന്റെ മറവിൽ ചൈനയിൽ നിന്ന് സിസാങ്ങിനെ വേർപെടുത്താൻ ശ്രമിച്ചുവെന്നും മാവോ ആരോപിച്ചു.