ന്യൂഡൽഹി: ഗൂഗിൾ ക്രോം ബ്രൗസറിൽ ഗുരുതരമായ സുരക്ഷാ പിഴവുകൾ കണ്ടെത്തിയതിനെത്തുടർന്ന് ഉപയോക്താക്കൾക്ക് അതീവ ജാഗ്രത നിർദ്ദേശം നൽകി കേന്ദ്ര സർക്കാർ (CERT-In Google Chrome High Severity Alert). ഇലക്ട്രോണിക്സ് ആൻഡ് ഇൻഫർമേഷൻ ടെക്നോളജി മന്ത്രാലയത്തിന് കീഴിലുള്ള ഇന്ത്യൻ കമ്പ്യൂട്ടർ എമർജൻസി റെസ്പോൺസ് ടീം ആണ് ഈ മുന്നറിയിപ്പ് പുറപ്പെടുവിച്ചത്. ഹാക്കർമാർക്ക് നിങ്ങളുടെ സിസ്റ്റത്തിലേക്ക് നുഴഞ്ഞുകയറാനും വിവരങ്ങൾ ചോർത്താനും ഈ സുരക്ഷാ പഴുതുകൾ കാരണമാകുമെന്ന് ഏജൻസി വ്യക്തമാക്കി.
ക്രോം ബ്രൗസറിലെ സിഎസ്എസ് (CSS) ഘടകത്തിലുള്ള ‘യൂസ്-ആഫ്റ്റർ-ഫ്രീ’ (Use-After-Free) എന്ന സാങ്കേതിക പിഴവാണ് ഇതിന് പ്രധാന കാരണം. വിൻഡോസ്, മാക് ഒഎസ് ഉപയോക്താക്കൾ 145.0.7632.75/76 എന്ന വേർഷന് മുൻപുള്ളവരും, ലിനക്സ് ഉപയോക്താക്കൾ 144.0.7559.75-ന് മുൻപുള്ള വേർഷനുകളും ഉപയോഗിക്കുന്നുണ്ടെങ്കിൽ നിങ്ങളുടെ ഡാറ്റ അപകടത്തിലായേക്കാം. വ്യാജ ലിങ്കുകളിലൂടെയോ വെബ്സൈറ്റുകളിലൂടെയോ റിമോട്ട് അറ്റാക്കർമാർക്ക് സിസ്റ്റത്തിന്റെ നിയന്ത്രണം ഏറ്റെടുക്കാൻ ഈ ബഗ് വഴി സാധിക്കും.
നിങ്ങളുടെ സിസ്റ്റം സുരക്ഷിതമാക്കാൻ ബ്രൗസർ ഉടൻ തന്നെ പുതിയ വേർഷനിലേക്ക് അപ്ഡേറ്റ് ചെയ്യുക. ബ്രൗസറിന്റെ മുകളിൽ വലതുവശത്തുള്ള മൂന്ന് ഡോട്ടുകളിൽ ക്ലിക്ക് ചെയ്ത് സെറ്റിങ്സിൽ പോകുക. തുടർന്ന് ‘എബൗട്ട് ക്രോം’ (About Chrome) എന്നത് തിരഞ്ഞെടുത്താൽ ബ്രൗസർ ഓട്ടോമാറ്റിക്കായി അപ്ഡേറ്റ് ആകും. അപ്ഡേഷന് ശേഷം ബ്രൗസർ റീസ്റ്റാർട്ട് ചെയ്യാൻ മറക്കരുത്.
Summary:
The Indian government’s cybersecurity agency, CERT-In, has issued a high-severity alert for Google Chrome users due to critical vulnerabilities in the browser’s CSS component. Attackers could exploit these flaws to execute harmful code or take control of systems, and users are urgently advised to update their browsers to the latest patched versions to stay protected.
