ന്യൂഡൽഹി: മഹാത്മാ ഗാന്ധി ദേശീയ ഗ്രാമീണ തൊഴിലുറപ്പ് പദ്ധതിയുടെ (എം.ജി.എൻ.ആർ.ഇ.ജി.എ.) പേര് മാറ്റുന്നതിനുള്ള ബിൽ കേന്ദ്ര സർക്കാർ ഉടൻ പാർലമെന്റിൽ അവതരിപ്പിക്കും. 'വികസിത് ഭാരത് – ഗാരന്റി ഫോർ റോസ്ഗർ ആൻഡ് അജീവിക മിഷൻ (ഗ്രാമീൺ) (വി.ബി.– ജി.ആർ.എ.എം. ജി. ബിൽ), 2025' എന്നാണ് പുതിയ പദ്ധതിയുടെ പേര്.(Centre to rename MGNREGA scheme, Bill to be introduced)
ലോക്സഭയും രാജ്യസഭയും ഉച്ചവരെ പിരിഞ്ഞെങ്കിലും, ഉച്ചകഴിഞ്ഞ് പുതിയ ബിൽ അവതരിപ്പിക്കുമെന്നാണ് പ്രതീക്ഷിക്കുന്നത്. 2005-ലാണ് ദേശീയ തൊഴിലുറപ്പ് പദ്ധതി രാജ്യത്ത് ആദ്യമായി നടപ്പാക്കിയത്. 2009-ൽ പദ്ധതിക്ക് മഹാത്മാ ഗാന്ധിയുടെ പേര് നൽകി 'എം.ജി.എൻ.ആർ.ഇ.ജി.എ.' എന്നാക്കി മാറ്റി.
ഗ്രാമീണ മേഖലകളിലെ സാമ്പത്തികമായി പിന്നാക്കം നിൽക്കുന്ന അവിദഗ്ധ തൊഴിലാളികൾക്ക് ഒരു വർഷം 100 തൊഴിൽ ദിനങ്ങൾ ഉറപ്പുവരുത്തുകയായിരുന്നു ഈ പദ്ധതിയുടെ ലക്ഷ്യം. നിലവിൽ 15.4 കോടി പേർ ഈ പദ്ധതിയുടെ ഭാഗമായി തൊഴിലെടുക്കുന്നുണ്ട്. ഇതിൽ മൂന്നിലൊന്നും സ്ത്രീകളാണ്.