ബംഗളൂരുവിൽ സി.എ. വിദ്യാർത്ഥിനിയെ തട്ടിക്കൊണ്ടുപോയി; അഞ്ച് പേർ അറസ്റ്റിൽ, പ്രതി ജയിൽ ശിക്ഷ അനുഭവിച്ചയാൾ | CA student kidnapped

ബംഗളൂരു: സുബ്രഹ്മണ്യപുര പൊലീസ് സ്റ്റേഷൻ പരിധിയിൽ 19 വയസ്സുള്ള ചാർട്ടേഡ് അക്കൗണ്ടൻസി (സി.എ.) വിദ്യാർത്ഥിനിയെ വീട്ടിൽ അതിക്രമിച്ച് കയറി തട്ടിക്കൊണ്ടുപോയ സംഭവത്തിൽ അഞ്ച് പേരടങ്ങുന്ന സംഘത്തെ ബംഗളൂരു പോലീസ് ശനിയാഴ്ച അറസ്റ്റ് ചെയ്തു. തട്ടിക്കൊണ്ടുപോയ പെൺകുട്ടിയെ പോലീസ് രക്ഷപ്പെടുത്തി. രംഗനാഥ്, രാജേഷ്, ചന്ദൻ, ശ്രേയസ്, മഞ്ജുനാഥ് എന്നിവരാണ് പോലീസിന്റെ പിടിയിലായത്.

സംഭവത്തിന്റെ വിശദാംശങ്ങൾ

ബൈക്ക് മെക്കാനിക്കായ രംഗനാഥ് പെൺകുട്ടിക്ക് പരിചിതനായിരുന്നു. ഇയാൾ മുമ്പ് ഒരു കൊലപാതക കേസിൽ ജയിൽ ശിക്ഷ അനുഭവിച്ചയാളാണ്. പെൺകുട്ടിയെ വിവാഹം കഴിക്കാൻ നിർബന്ധിച്ച് രംഗനാഥ് രണ്ടുതവണ വീട്ടിലെത്തി ബഹളമുണ്ടാക്കിയിരുന്നു. തുടർന്ന് കഴിഞ്ഞ ബുധനാഴ്ച വൈകീട്ട് രംഗനാഥും നാല് കൂട്ടാളികളും ബൈക്കുകളിലും ഓട്ടോറിക്ഷയിലുമായി എത്തി ചിക്കല്ലസാന്ദ്രക്കടുത്തുള്ള സിംഹാദ്രി ലേഔട്ടിലുള്ള വീട്ടിൽ അതിക്രമിച്ച് കയറി പെൺകുട്ടിയെ ബലമായി തട്ടിക്കൊണ്ടുപോകുകയായിരുന്നു. തടയാൻ ശ്രമിച്ച പെൺകുട്ടിയുടെ മാതാപിതാക്കളെ ആയുധങ്ങൾ ഉപയോഗിച്ച് ആക്രമിക്കുകയും ചെയ്തു.

പോലീസ് നടപടി

പെൺകുട്ടിയുടെ പിതാവ് സുബ്രഹ്മണ്യപുര പൊലീസ് സ്റ്റേഷനിൽ നൽകിയ പരാതിയുടെ അടിസ്ഥാനത്തിൽ പോലീസ് രണ്ട് പ്രത്യേക ടീമുകൾ രൂപവത്കരിച്ച് പ്രതികളെ കണ്ടെത്തി.ചോദ്യം ചെയ്യലിൽ ഇവർ കുറ്റം സമ്മതിച്ചതിനെത്തുടർന്ന് അറസ്റ്റ് രേഖപ്പെടുത്തി കോടതിയിൽ ഹാജരാക്കി ജുഡീഷ്യൽ കസ്റ്റഡിയിൽ വിട്ടു. സൗത്ത് ഈസ്റ്റ് ഡിവിഷൻ ഡി.സി.പി. അനിത ബി. ഹദ്ദന്നവറിൻ്റെ നേതൃത്വത്തിലായിരുന്നു അന്വേഷണം.