ന്യൂഡൽഹി: സ്വദേശി ഉൽപ്പന്നങ്ങളെ പ്രോത്സാഹിപ്പിക്കണമെന്ന് ജനങ്ങളോട് വീണ്ടും ആഹ്വാനം ചെയ്ത് പ്രധാനമന്ത്രി നരേന്ദ്ര മോദി. പ്രതിമാസ റേഡിയോ പരിപാടിയായ മൻ കി ബാത്തിന്റെ 128-ാമത് പതിപ്പിലാണ് ക്രിസ്മസ്, പുതുവത്സര സമയങ്ങളിൽ ഇന്ത്യൻ ഉൽപ്പന്നങ്ങൾ വാങ്ങണമെന്ന് പ്രധാനമന്ത്രി ആവശ്യപ്പെട്ടത്. ജി-20 ഉച്ചകോടിയിൽ താൻ ലോക നേതാക്കൾക്ക് സമ്മാനിച്ചത് ഇന്ത്യൻ നിർമ്മിത ഉൽപ്പന്നങ്ങളാണെന്നും മോദി ചൂണ്ടിക്കാട്ടി.(Buy Indian products for Christmas, PM Modi in Mann Ki Baat)
ജി-20 വേളയിൽ ലോക നേതാക്കൾക്ക് നൽകിയ സമ്മാനങ്ങളെക്കുറിച്ച് സംസാരിക്കവെ മോദി കേരളത്തെ പ്രത്യേകം പരാമർശിച്ചു. ഓസ്‌ട്രേലിയൻ പ്രധാനമന്ത്രിക്ക് സമ്മാനിച്ചത് കേരളത്തിലെ മാന്നാറിൽ നിർമ്മിച്ച പിച്ചള ഉരുളിയാണ്. തമിഴ്‌നാട്ടിലെ തഞ്ചാവൂരിലെ നടരാജന്റെ വെങ്കല പ്രതിമ ദക്ഷിണാഫ്രിക്കൻ പ്രസിഡന്റിനും, രാജസ്ഥാനിലെ ഉദയ്‌പൂരിലെ വെള്ളിക്കുതിരയെ കാനഡ പ്രധാനമന്ത്രിക്കും, തെലങ്കാനയിലെ കരിംനഗറിലെ വെള്ളി ബുദ്ധനെ ജപ്പാൻ പ്രധാനമന്ത്രിക്കും മോദി സമ്മാനിച്ചു.
'ഭാരതീയ കരകൗശല വസ്തുക്കൾ, കല, പാരമ്പര്യം എന്നിവയെക്കുറിച്ച് ലോകത്തെ ബോധവാന്മാരാക്കുക, നമ്മുടെ കരകൗശല വിദഗ്ധർക്ക് ഒരു ആഗോള വേദി നൽകുക എന്നിവയായിരുന്നു തന്റെ ലക്ഷ്യം' എന്നും അദ്ദേഹം പറഞ്ഞു. അന്തർവാഹിനി പ്രതിരോധ യുദ്ധക്കപ്പലായ ഐ.എൻ.എസ്. മാഹിയുടെ പേരുമായി കേരളത്തിനുള്ള ബന്ധവും മോദി എടുത്തുപറഞ്ഞു. സമ്പന്നമായ ചരിത്ര പൈതൃകമുള്ള മാഹി എന്ന സ്ഥലത്തിന്റെ പേരിലാണ് കപ്പലിന് പേരിട്ടത്.
കപ്പലിന്റെ ചിഹ്നം പരമ്പരാഗതമായി കളരിപ്പയറ്റിൽ ഉപയോഗിക്കുന്ന ഉറുമിയോട് സാമ്യമുള്ളതാണെന്ന് കേരളത്തിലും തമിഴ്‌നാട്ടിലുമുള്ള പലരും ചൂണ്ടിക്കാട്ടിയതായും മോദി പറഞ്ഞു. ഡിസംബർ 4 ന് നാവിക ദിനം ആഘോഷിക്കുമെന്നും സ്വാശ്രയത്വത്തിലേക്ക് അതിവേഗം നീങ്ങുന്ന നാവികസേനയിൽ അഭിമാനമുണ്ടെന്നും അദ്ദേഹം കൂട്ടിച്ചേർത്തു.
കായികരംഗത്തും, ബഹിരാകാശ മേഖലയിലും, കാർഷിക രംഗത്തും ഇന്ത്യ നടത്തിയ മുന്നേറ്റങ്ങളെക്കുറിച്ചും പ്രധാനമന്ത്രി പരാമർശിച്ചു. 357 ദശലക്ഷം ടൺ ഭക്ഷ്യധാന്യ ഉൽപാദനത്തോടെ രാജ്യം ചരിത്ര റെക്കോർഡ് സൃഷ്ടിച്ചു. 10 വർഷം മുമ്പുള്ളതിനേക്കാൾ 100 ദശലക്ഷം ടൺ അധിക ഉൽപാദനമാണ് ഇപ്പോൾ. സ്കൈറൂട്ടിന്റെ ഇൻഫിനിറ്റി കാമ്പസ് രാജ്യത്തിന്റെ ബഹിരാകാശ ഇക്കോ സംവിധാനത്തിന് പുതിയ മാനം നൽകി.
ചന്ദ്രയാൻ-2 ബന്ധം നഷ്ടപ്പെട്ടപ്പോൾ നിരാശരാകാതെ ചന്ദ്രയാൻ-3-ന്റെ വിജയഗാഥ എഴുതാൻ ശാസ്ത്രജ്ഞർ തുടങ്ങിയത് പരാജയത്തെ മറികടന്നുള്ള ആത്മവിശ്വാസത്തിന്റെ വിജയമാണെന്നും മോദി പറഞ്ഞു. കോമൺവെൽത്ത് ഗെയിംസിന് ആതിഥേയത്വം വഹിക്കാനുള്ള പ്രഖ്യാപനവും അദ്ദേഹം ചൂണ്ടിക്കാട്ടി.