ഹൈദരാബാദ്: തെലങ്കാനയിൽ സ്വകാര്യ എ.സി. സ്ലീപ്പർ ബസിന് തീപിടിച്ചു. ജീവനക്കാരുടെ സമയോചിതമായ ഇടപെടൽ കാരണം ബസിലുണ്ടായിരുന്ന 29 യാത്രക്കാരും സുരക്ഷിതമായി രക്ഷപ്പെട്ടു. തീപിടിത്തത്തിൽ ബസ് പൂർണ്ണമായും കത്തിനശിച്ചു.(Bus caught fire again in Telangana, All 29 passengers saved)
ഹൈദരാബാദ്-വിജയവാഡ ദേശീയപാത 65-ൽ തെലങ്കാനയിലെ നൽഗൊണ്ട ജില്ലയിലാണ് അപകടമുണ്ടായത്. വിഹാരി ട്രാവൽസ് എന്ന സ്വകാര്യ ബസാണ് ഇന്ന് പുലർച്ചെ അപകടത്തിൽപ്പെട്ടത്. പുലർച്ചെ 1.30 ഓടെയാണ് സംഭവം നടന്നതെന്ന് ചിറ്റ്യാല പോലീസ് അറിയിച്ചു.
ഹൈദരാബാദിലെ ബിഎച്ച്ഇഎൽ എന്ന സ്ഥലത്തുനിന്ന് നെല്ലൂരിലേക്ക് പോവുകയായിരുന്നു ബസ്. "ബസിനുള്ളിൽ പെട്ടെന്ന് തീ പടർന്നുപിടിക്കുകയായിരുന്നു. ഡ്രൈവറും കണ്ടക്ടറും ചേർന്ന് എല്ലാ യാത്രക്കാരെയും പുറത്തിറക്കി സുരക്ഷിതരാക്കി," ചിറ്റ്യാല പോലീസ് പറഞ്ഞു.
അപകട വിവരം ലഭിച്ച ഉടൻ പോലീസ് സംഘം ഫയർ ഫോഴ്‌സിനൊപ്പം സ്ഥലത്തെത്തി തീ നിയന്ത്രണ വിധേയമാക്കി. തീപിടിത്തത്തിന്റെ കാരണം കണ്ടെത്താൻ അന്വേഷണം ആരംഭിച്ചതായും പോലീസ് കൂട്ടിച്ചേർത്തു.