ന്യൂഡൽഹി: ഡൽഹിയിലെ മൂന്ന് സ്കൂളുകൾക്ക് ബോംബ് ഭീഷണി(Bomb threat). ഇ-മെയിൽ വഴിയാണ് ഭീഷണി സന്ദേശം ലഭിച്ചത്. ദ്വാരകയിലെ സിആർപിഎഫ് സ്കൂൾ, ചണക്യപുരിയിലെ നേവി ചിൽഡ്രൻ സ്കൂൾ, രോഹിണി പ്രദേശത്തുള്ള ഒരു സ്കൂൾ എന്നിവിടങ്ങളിൽ ഇന്ന് രാവിലെയാണ് സന്ദേശം ലഭിച്ചത്. സംഭവത്തെ തുടർന്ന് സ്കൂൾ അധികൃതർ വിദ്യാർത്ഥികളെ വീട്ടിലേക്ക് തിരിച്ചയച്ചു.
സന്ദേശം ലഭിച്ചയുടൻ അധികൃതർ പോലീസിനെ വിവരം അറിയിക്കുകയായിരുന്നു. തുടർന്ന് സ്ഥലത്തെത്തിയ പോലീസും ബോംബ് സ്ക്വാഡും സ്കൂളുകളിൽ പരിശോധന നടത്തിയെങ്കിലും സംശയാസ്പദമായ വസ്തുക്കളൊന്നും കണ്ടെത്താനായില്ല. മൂന്ന് സ്കൂളുകൾക്കും ജാഗ്രത നിർദ്ദേശം നൽകിയ പോലീസ് പ്രദേശങ്ങളിൽ തിരച്ചിൽ തുടരുകായാണ്.