പട്ന: ബിഹാറിലെ വൈശാലി ജില്ലയിൽ നവവധു ദുരൂഹസാഹചര്യത്തിൽ മരിച്ച സംഭവത്തിൽ ഭർത്താവിനും കുടുംബത്തിനുമെതിരെ ഗുരുതര ആരോപണങ്ങളുമായി യുവതിയുടെ മാതാപിതാക്കൾ (Bihar Dowry Death). സരൺ ജില്ലയിലെ ഹരിഹർ നാഥ് പോലീസ് സ്റ്റേഷൻ പരിധിയിലുള്ള പേഡിയ ബസാർ സ്വദേശിനി സരിതയുടെ മൃതദേഹമാണ് ഭർത്താവും സംഘവും വീട്ടുപടിക്കൽ ഉപേക്ഷിച്ചത്. ജനുവരി 16-ന് പുലർച്ചെ 12:30-ഓടെ കറുത്ത സ്കോർപ്പിയോ കാറിലെത്തിയ സംഘം മൃതദേഹം വീടിന് മുന്നിൽ തള്ളിയ ശേഷം കടന്നുകളയുകയായിരുന്നു.
ഈ കൊടുംക്രൂരതയ്ക്ക് ഉപയോഗിച്ച വാഹനം ഒരു പോലീസ് ഉദ്യോഗസ്ഥന്റേതാണെന്ന കണ്ടെത്തൽ കേസിന് പുതിയ വഴിത്തിരിവ് നൽകിയിട്ടുണ്ട്. മുസാഫർപൂർ ജില്ലയിൽ ജോലി ചെയ്യുന്ന സബ് ഇൻസ്പെക്ടർ സന്തോഷ് രജക്കിന്റെ പേരിലുള്ളതാണ് മൃതദേഹം കൊണ്ടുവന്ന വാഹനമെന്ന് പോലീസ് സ്ഥിരീകരിച്ചു. സംഭവത്തിൽ ഉദ്യോഗസ്ഥന് നേരിട്ട് പങ്കുണ്ടോ അതോ അദ്ദേഹത്തിന്റെ വാഹനം ദുരുപയോഗം ചെയ്തതാണോ എന്ന് പോലീസ് അന്വേഷിച്ചു വരികയാണ്. വീടിന് മുന്നിലെ സിസിടിവി ദൃശ്യങ്ങളിൽ മൃതദേഹം തള്ളുന്നതിന്റെ വ്യക്തമായ ദൃശ്യങ്ങൾ പതിഞ്ഞിട്ടുണ്ട്.
സ്ത്രീധന പീഡനമാണ് കൊലപാതകത്തിന് പിന്നിലെന്ന് സരിതയുടെ പിതാവ് ആരോപിച്ചു. ഒൻപത് മാസം മുൻപായിരുന്നു സത്യേന്ദ്ര കുമാറുമായുള്ള സരിതയുടെ വിവാഹം. വിവാഹസമയത്ത് പണവും സ്വർണ്ണവും നൽകിയിരുന്നെങ്കിലും ഭർത്താവിന്റെ കുടുംബം കൂടുതൽ പണം ആവശ്യപ്പെട്ട് സരിതയെ നിരന്തരം ഉപദ്രവിച്ചിരുന്നു. ഭൂമി രജിസ്റ്റർ ചെയ്യാനായി 8 ലക്ഷം രൂപ ഇതിനോടകം നൽകിയതായും, കൂടുതൽ പണത്തിനായി അവർ സമ്മർദ്ദം ചെലുത്തിയിരുന്നതായും പിതാവ് പറഞ്ഞു. മകളുടെ കഴുത്തിൽ ശ്വാസം മുട്ടിച്ചതിന്റെ പാടുകൾ ഉണ്ടെന്നും ഇത് ആസൂത്രിതമായ കൊലപാതകമാണെന്നും കുടുംബം പരാതിപ്പെട്ടു.
സംഭവത്തിൽ ഭർത്താവുൾപ്പെടെ അഞ്ച് പേർക്കെതിരെ പോലീസ് എഫ്.ഐ.ആർ രജിസ്റ്റർ ചെയ്തിട്ടുണ്ട്. കുറ്റകൃത്യത്തിന് ഉപയോഗിച്ച വാഹനം പോലീസ് കസ്റ്റഡിയിലെടുത്തു. മൃതദേഹം പോസ്റ്റ്മോർട്ടത്തിനായി അയച്ചിരിക്കുകയാണ്. ഒരു പോലീസ് ഉദ്യോഗസ്ഥന്റെ വാഹനം ഉൾപ്പെട്ട കേസ് എന്ന നിലയിൽ അതീവ ഗൗരവത്തോടെയാണ് അന്വേഷണം നടത്തുന്നതെന്നും പ്രതികളെ ഉടൻ പിടികൂടുമെന്നും ജില്ലാ പോലീസ് അറിയിച്ചു.
The body of a newlywed woman named Sarita was dumped outside her parents' home in Bihar’s Saran district by her husband and his accomplices in a Scorpio. Investigations revealed that the vehicle belongs to a police sub-inspector, adding a sensational twist to the suspected dowry murder case. Sarita’s family alleged that she was killed over demands for additional money, following which police seized the car and launched a manhunt for the five accused.