യുവാക്കൾക്കിടയിൽ ലഹരിയുടെ അമിതമായ ഉപയോഗം ക്രമാതീതമായി വർധിച്ചുവരുന്നതിനിടയിൽ, കടുത്ത ആരോഗ്യപരമായ ആശങ്കകൾ സൃഷ്ടിച്ചുകൊണ്ട് 'ബ്ലൂടൂത്തിംഗ്' എന്ന പുതിയ ലഹരി ഉപയോഗ രീതി വ്യാപകമാവുകയാണ്. എയ്ഡ്‌സ് ഉൾപ്പെടെയുള്ള നിരവധി അസുഖങ്ങൾ ആളുകളിലേക്ക് പടരാനുള്ള സാധ്യത ഇത് ഇരട്ടിയാക്കുമെന്ന് ആരോഗ്യ വിദഗ്ധർ മുന്നറിയിപ്പ് നൽകുന്നു.
എന്താണ് 'ബ്ലൂടൂത്തിംഗ്'?
ലഹരി ഉപയോഗിച്ച വ്യക്തിയിൽ നിന്ന് രക്തം സിറിഞ്ച് വഴി കുത്തിയെടുത്ത്, അത് സ്വന്തം ശരീരത്തിലേക്ക് കുത്തി വെക്കുന്ന പ്രക്രിയയെയാണ് 'ബ്ലൂടൂത്തിംഗ്' എന്ന് പറയുന്നത്.
ഇതിലൂടെ ആദ്യത്തെ വ്യക്തി ഉപയോഗിച്ച ലഹരിയുടെ 'എഫക്ട്' രണ്ടാമത്തെ ആളിലേക്ക് പകരുന്നു. അമിത വിലയിൽ ലഹരി വാങ്ങാൻ കഴിയാതെ വരുമ്പോഴാണ് പലരും ഈ അപകടകരമായ പ്രവണതയിലേക്ക് കടക്കുന്നത്. സാധാരണ ലഹരി ഉപയോഗത്തെക്കാൾ പതിന്മടങ്ങ് അപകടകരമാണ് ഈ രീതി. ഹെറോയിൻ, മെത്താംഫെറ്റാമൈൻ എന്നിവയാണ് ഇത്തരത്തിൽ കുത്തിവയ്ക്കപ്പെടുന്ന പ്രധാന ലഹരികൾ.
ആരോഗ്യപരമായ അപകട സാധ്യതകൾ
ലഹരിയും രക്തവും പങ്കുവെക്കുന്ന ഈ രീതി ഗുരുതരമായ ആരോഗ്യപ്രശ്നങ്ങളിലേക്ക് നയിക്കുന്നു:
എച്ച്.ഐ.വി. (എയ്ഡ്‌സ്) വ്യാപനം: എച്ച്.ഐ.വി. പടരാൻ ഏറ്റവും കൂടുതൽ സാധ്യതയുള്ള ഒന്നാണ് 'ബ്ലൂടൂത്തിംഗ്'. സിറിഞ്ചുകൾ പങ്കിടുന്നതാണ് ഇതിന് പ്രധാന കാരണം.
രക്തഗ്രൂപ്പുകൾ തമ്മിലുള്ള പ്രതികരണം: രണ്ട് വ്യത്യസ്ത രക്തഗ്രൂപ്പുകൾ തമ്മിൽ കലരുന്നത് ഗുരുതരമായ പ്രതികരണങ്ങൾക്ക് കാരണമായേക്കാം.
മറ്റ് അണുബാധകൾ: രക്തവും സൂചികളും പങ്കുവെക്കുന്നതിലൂടെ ഹെപ്പറ്റൈറ്റിസ് ബി, സി, അതുപോലെ ജീവന് ഭീഷണിയായേക്കാവുന്ന സെപ്‌സിസും മറ്റ് അണുബാധകളും ഉണ്ടാകാനുള്ള സാധ്യതകളുണ്ട്.
കൃത്യമായ ബോധവത്കരണത്തിലൂടെയും ശക്തമായ പ്രതിരോധ പ്രവർത്തനങ്ങളിലൂടെയും മാത്രമേ 'ബ്ലൂടൂത്തിംഗ്' പോലുള്ള അപകടകരമായ പ്രവണതകൾ തടയാനാകൂവെന്ന് വിദഗ്ധർ അഭിപ്രായപ്പെടുന്നു.