ബംഗളൂരു: ഇലക്ട്രോണിക് സിറ്റി ഫേസ്-2 വിലെ ബയോക്കോൺ (Biocon) കമ്പനി വളപ്പിൽ യുവ ജീവനക്കാരനെ മരിച്ച നിലയിൽ കണ്ടെത്തി. ബനാശങ്കരി സ്വദേശിയും കമ്പനിയിലെ ഫിനാൻസ് വിഭാഗം ഉദ്യോഗസ്ഥനുമായ അനന്ത കുമാർ (26) ആണ് മരിച്ചത്. ചൊവ്വാഴ്ച ഉച്ചയോടെയാണ് നാടിനെ നടുക്കിയ സംഭവം ഉണ്ടായത്.
കമ്പനി കെട്ടിടത്തിന്റെ നാലാം നിലയിലെ കൈവരിയിൽ നിന്ന് അനന്ത കുമാർ താഴേക്ക് വീഴുകയായിരുന്നുവെന്നാണ് പോലീസിന്റെ പ്രാഥമിക നിഗമനം. ഇത് അപകടമാണോ അതോ ആത്മഹത്യയാണോ എന്ന കാര്യത്തിൽ വ്യക്തത വന്നിട്ടില്ല. സംഭവസ്ഥലത്ത് നിന്ന് ആത്മഹത്യാ കുറിപ്പുകളൊന്നും കണ്ടെത്തിയിട്ടില്ലെന്ന് പോലീസ് അറിയിച്ചു.
മൃതദേഹം പോസ്റ്റ്മോർട്ടം നടപടികൾക്കായി സമീപത്തെ ആശുപത്രിയിലേക്ക് മാറ്റിയിരിക്കുകയാണ്. സംഭവത്തിൽ പരപ്പന അഗ്രഹാര പോലീസ് കേസെടുത്ത് അന്വേഷണം ആരംഭിച്ചു. ജീവനക്കാരന്റെ അപ്രതീക്ഷിത വിയോഗത്തിൽ ബയോക്കോൺ അധികൃതർ അനുശോചനം രേഖപ്പെടുത്തി. അന്വേഷണം പുരോഗമിക്കുന്നതിനാൽ കൂടുതൽ പ്രതികരണങ്ങൾക്കില്ലെന്ന് കമ്പനി പ്രസ്താവനയിൽ വ്യക്തമാക്കി.