പട്ന: ബിഹാറിലെ മൂന്ന് ജില്ലകളിലായി ആറ് മുനിസിപ്പൽ കൗൺസിലുകളിൽ നാളെ വോട്ടെടുപ്പ് നടക്കും(Election). പട്ന, റോഹ്താസ്, ഈസ്റ്റ് ചമ്പാരൻ എന്നിവിടങ്ങളിലെ കൗൺസിലുകളിലാണ് വോട്ടെടുപ്പ് നടക്കുക. ഈ വർഷം അവസാനം സംസ്ഥാനത്ത് നിയമസഭാ തിരഞ്ഞെടുപ്പും നടക്കും. മൊബൈൽ ഫോൺ വഴി വോട്ടുചെയ്യാൻ അനുമതി നൽകുന്ന ആദ്യ സംസ്ഥാനമായി ബിഹാർ മാറുമെന്ന് സംസ്ഥാന തിരഞ്ഞെടുപ്പ് കമ്മീഷണർ ദീപക് പ്രസാദ് വ്യക്തമാക്കി.
ഇ-വോട്ടിംഗിനായി രജിസ്റ്റർ ചെയ്യാൻ ആഗ്രഹിക്കുന്ന വോട്ടർമാർ അവരുടെ മൊബൈലിൽ ഇ-SECBHR ആപ്പ് ഡൗൺലോഡ് ചെയ്യണം. ഫോണിൽ ഇൻസ്റ്റാൾ ചെയ്യുന്ന ഈ ആപ്പ് വഴി വോട്ട് രേഖപ്പെടുത്താൻ സാധിക്കും. വോട്ടെടുപ്പ് ദിവസം പോളിംഗ് ബൂത്തിൽ പോകാൻ കഴിയാത്തവർക്ക് ഈ സംവിധാനം പ്രയോജനപ്പെടുത്താനാകും. ഇത് സംബന്ധിച്ച് ജൂൺ 10 മുതൽ 22 വരെ ഒരു ബോധവൽക്കരണ കാമ്പയിൻ നടത്തിയതായും അദ്ദേഹം വ്യക്തമാക്കി.