പട്ന: ബിഹാർ നിയമസഭാ തിരഞ്ഞെടുപ്പിന് പിന്നാലെ പുതിയ സർക്കാർ ഈയാഴ്ച ചുമതലയേൽക്കും. ജെഡിയു നേതാവ് നിതീഷ് കുമാർ തന്നെ വീണ്ടും മുഖ്യമന്ത്രിയാകുമെന്ന് ജെഡിയു നേതൃത്വം ഉറപ്പിച്ചു. ചൊവ്വാഴ്ച പുതിയ സർക്കാർ സത്യപ്രതിജ്ഞ ചെയ്യുമെന്നാണ് നിലവിലെ റിപ്പോർട്ടുകൾ. പട്നയിൽ നടക്കുന്ന സത്യപ്രതിജ്ഞാ ചടങ്ങിൽ പ്രധാനമന്ത്രി ഉൾപ്പെടെയുള്ള പ്രമുഖർ പങ്കെടുത്തേക്കും. നിലവിലെ സർക്കാരിൻ്റെ കാലാവധി നവംബർ 22-ന് അവസാനിക്കും.(Bihar government to take charge this week, Chief Minister will be Nitish Kumar)
സർക്കാർ രൂപീകരണം സംബന്ധിച്ച ചർച്ചകൾ എൻഡിഎയിൽ സജീവമായി നടക്കുകയാണ്. കേന്ദ്ര ആഭ്യന്തര മന്ത്രി അമിത് ഷായുമായി ജെഡിയു നേതാവ് സഞ്ജയ് ജാ കൂടിക്കാഴ്ച നടത്തി. കേന്ദ്രമന്ത്രി ധർമേന്ദ്ര പ്രധാൻ, ബിജെപി നേതാവ് വിനോദ് താവ്ഡെ എന്നിവരും ചർച്ചയിൽ പങ്കെടുത്തു. ഇന്ന് (നവംബർ 16) ജെഡിയു നിയമസഭാ കക്ഷി യോഗം ചേർന്ന് നിതീഷ് കുമാറിനെ കക്ഷി നേതാവായി ഔദ്യോഗികമായി തിരഞ്ഞെടുക്കുമെന്നാണ് സൂചന.
ഏറ്റവും വലിയ ഒറ്റക്കക്ഷിയായ ബിജെപിക്ക് നിലവിൽ മറ്റൊരു സാധ്യതയെക്കുറിച്ച് ആലോചനയില്ല. നിതീഷ് കുമാർ തന്നെ മുഖ്യമന്ത്രിയാകുമെന്ന സൂചന ഇന്നലെ പ്രവർത്തകരെ അഭിസംബോധന ചെയ്തുകൊണ്ട് പ്രധാനമന്ത്രിയും നൽകിയിരുന്നു. എന്നാൽ, ഭാവിയിൽ മുഖ്യമന്ത്രി സ്ഥാനത്തിനായി ബിജെപി അവകാശവാദമുന്നയിക്കാനുള്ള സാധ്യത തള്ളിക്കളയാനാവില്ല.
രണ്ട് ഉപമുഖ്യമന്ത്രി സ്ഥാനങ്ങളും ബിജെപി നിലനിർത്തും. ചിരാഗ് പാസ്വാന് സ്വാധീനമുണ്ടെങ്കിലും നിലവിലെ രാഷ്ട്രീയ സാഹചര്യം അദ്ദേഹം കലുഷിതമാക്കാൻ സാധ്യതയില്ല. വനിതാ വോട്ടർമാരുടെ ശക്തമായ പിന്തുണയിൽ വീണ്ടും അധികാരത്തിലെത്തുമ്പോൾ, പുതിയ സർക്കാരിൻ്റെ ആദ്യ മന്ത്രിസഭാ യോഗത്തിൽ തന്നെ കൂടുതൽ വനിതാ ക്ഷേമ പദ്ധതികൾ പ്രഖ്യാപിക്കാൻ സാധ്യതയുണ്ട്.
ആകെയുള്ള 243 സീറ്റുകളിൽ 10 ശതമാനം (25 സീറ്റ്) നേടിയതിലൂടെ ആർജെഡിക്ക് കഷ്ടിച്ച് പ്രതിപക്ഷ നേതൃസ്ഥാനം ലഭിച്ചു. 25 സീറ്റ് നേടിയ ആർജെഡിക്ക് ഒരു സീറ്റ് കുറവായിരുന്നെങ്കിൽ പ്രതിപക്ഷ നേതൃസ്ഥാനം നഷ്ടപ്പെടുമായിരുന്നു. അതേസമയം, തിരഞ്ഞെടുപ്പിലെ വൻ തോൽവിയിൽ ആർജെഡി അന്വേഷണം നടത്തും. തിരഞ്ഞെടുപ്പ് അട്ടിമറിക്കപ്പെട്ടു എന്ന ആരോപണം ആർജെഡി ശക്തമായി ഉന്നയിക്കുന്നുണ്ട്.