ദിസ്പുർ: കുടിയൊഴിപ്പിക്കലിനെച്ചൊല്ലിയുള്ള തർക്കം സംഘർഷത്തിലേക്ക് വഴിമാറിയതോടെ അസമിലെ രണ്ട് ജില്ലകളിൽ ഇന്റർനെറ്റ് സേവനങ്ങൾ വിച്ഛേദിച്ചു. കർബി ആങ്ലോങ്, വെസ്റ്റ് കർബി ആങ്ലോങ് ജില്ലകളിലാണ് നിലവിൽ നിരോധനം ഏർപ്പെടുത്തിയിരിക്കുന്നത്. മൊബൈൽ ഡേറ്റ സേവനങ്ങൾ സസ്പെൻഡ് ചെയ്തെങ്കിലും വോയിസ് കോളുകൾക്കും ബ്രോഡ്ബാൻഡ് ടെലിഫോണുകൾക്കും തടസ്സമില്ല.
സർക്കാർ ഭൂമിയിലെ അനധികൃത കുടിയേറ്റക്കാരെ ഒഴിപ്പിക്കണമെന്ന ആവശ്യവുമായി ബന്ധപ്പെട്ടാണ് പ്രദേശത്ത് സംഘർഷം ആരംഭിച്ചത്.
സംഘർഷം രൂക്ഷമായതോടെ ഖെറോണി മാർക്കറ്റിന് ഒരു സംഘം തീയിട്ടു. ഇതോടെ സ്ഥിതിഗതികൾ നിയന്ത്രണാതീതമായി. കൂടുതൽ സുരക്ഷാ സേനയെ സ്ഥലത്ത് വിന്യസിച്ചിട്ടുണ്ട്.
ക്രമസമാധാന നില വഷളാകുമെന്ന ജില്ലാ മജിസ്ട്രേറ്റുമാരുടെ റിപ്പോർട്ടിനെത്തുടർന്നാണ് ആഭ്യന്തര വകുപ്പിന്റെ നടപടി. സോഷ്യൽ മീഡിയ വഴി പ്രകോപനപരമായ സന്ദേശങ്ങൾ പ്രചരിപ്പിക്കുന്നത് തടയാനാണ് ഇന്റർനെറ്റ് റദ്ദാക്കിയത്.
നിലവിൽ ഭരണകൂടം ജനപ്രതിനിധികളുമായി ചർച്ചകൾ നടത്തി വരികയാണ്. സ്ഥിതിഗതികൾ ശാന്തമായാൽ ഉടൻ ഇന്റർനെറ്റ് സേവനങ്ങൾ പുനഃസ്ഥാപിക്കുമെന്ന് അധികൃതർ അറിയിച്ചു.