ന്യൂഡൽഹി : ബിഹാറിൽ നടന്ന ഇന്ത്യാ സഖ്യത്തിൻ്റെ റാലിയിൽ പ്രധാനമന്ത്രി നരേന്ദ്ര മോദിക്കും അദ്ദേഹത്തിന്റെ പരേതയായ അമ്മയ്ക്കുമെതിരെ മോശം വാക്കുകൾ ഉപയോഗിക്കുന്നത് കാണിക്കുന്ന വീഡിയോ വൈറലായതിനെ തുടർന്ന് കേന്ദ്ര ആഭ്യന്തര മന്ത്രി അമിത് ഷാ വെള്ളിയാഴ്ച വിമർശനമുന്നയിച്ചു. രാജ്യത്ത് കോൺഗ്രസ് നേതാവ് "വെറുപ്പിന്റെ രാഷ്ട്രീയം" ആരംഭിച്ചിരിക്കുകയാണെന്ന് അദ്ദേഹം പറഞ്ഞു.(Amit Shah Slams Rahul Gandhi Over Abusive Slogans Against PM Modi)
പ്രധാനമന്ത്രിക്കെതിരായ മോശം പരാമർശങ്ങളെ അദ്ദേഹം അപലപിക്കുകയും കാലങ്ങളായി കോൺഗ്രസ് നേതാക്കൾ ഉപയോഗിക്കുന്ന അവഹേളനപരമായ വാക്കുകൾ പട്ടികപ്പെടുത്തുകയും ചെയ്തു.
രാഹുൽ ഗാന്ധിയുടെ വോട്ടർ അധികാർ യാത്രയ്ക്കിടെ ദർഭംഗയിൽ നടന്ന പൊതുയോഗത്തിൽ ഒരു കോൺഗ്രസ് പ്രവർത്തകൻ പ്രധാനമന്ത്രി മോദിയെ അധിക്ഷേപിക്കുന്നതായി കാണിക്കുന്ന വീഡിയോ ഓൺലൈനിൽ പുറത്തുവന്നതിനെത്തുടർന്ന് ബീഹാറിൽ വൻ വിവാദം പൊട്ടിപ്പുറപ്പെട്ടു. രാഹുൽ ഗാന്ധി, പ്രിയങ്ക ഗാന്ധി, തേജസ്വി യാദവ് എന്നിവരുടെ പോസ്റ്ററുകൾ പതിച്ച വേദിയിൽ നിന്ന് അയാൾ മോശം മുദ്രാവാക്യങ്ങൾ വിളിച്ചു. മുസാഫർപൂരിലേക്ക് അവർ പോയ അതേ സ്ഥലമായിരുന്നു ഇത്. ഈ പ്രവൃത്തിക്ക് ഒരാൾ അറസ്റ്റിലായി. രാഹുൽ ഗാന്ധിയെ അമിത് ഷാ വിമർശിച്ചു.