ഹൈദരാബാദ്: ഇന്ത്യയിലെ ഏറ്റവും വലിയ ഡോൾബി സിനിമാ സ്ക്രീനായ ‘അല്ലു സിനിമാസ്’ ഹൈദരാബാദിൽ പ്രവർത്തനമാരംഭിച്ചു (Allu Arjun Allu Cinemas Wall of Greats Controversy). തെലങ്കാന മുഖ്യമന്ത്രി രേവന്ത് റെഡി പങ്കെടുത്ത പ്രൗഢഗംഭീരമായ ചടങ്ങിലാണ് തിയേറ്റർ ഉദ്ഘാടനം ചെയ്തത്. എന്നാൽ, തിയേറ്ററിനുള്ളിലെ ‘വാൾ ഓഫ് ഗ്രേറ്റ്സ്’ (Wall of Greats) എന്നറിയപ്പെടുന്ന ചുവരിൽ പ്രമുഖരായ പല സംവിധായകരെയും ഒഴിവാക്കിയെന്നാരോപിച്ച് സോഷ്യൽ മീഡിയയിൽ വലിയ പ്രതിഷേധം ഉയരുകയാണ്.
സിനിമയിലെ ഇതിഹാസങ്ങളെ ആദരിക്കാനായി ഒരുക്കിയ ഈ ചുവരിൽ എസ്.എസ്. രാജമൗലി, സുകുമാർ, മണിരത്നം, ടി.വി. വിക്രം, റിഷഭ് ഷെട്ടി, ലിജോ ജോസ് പെല്ലിശ്ശേരി, സന്ദീപ് റെഡി വംഗ തുടങ്ങി പലരുടെയും ചിത്രങ്ങൾ ഉൾപ്പെടുത്തിയിട്ടുണ്ട്. എന്നാൽ ഇന്ത്യൻ സിനിമയിൽ വിപ്ലവം സൃഷ്ടിച്ച ശങ്കർ, രാം ഗോപാൽ വർമ്മ എന്നിവരുടെ ചിത്രങ്ങൾ ഇല്ലാത്തതാണ് ആരാധകരെ ചൊടിപ്പിച്ചത്.
തെലുങ്ക് സിനിമയിലെ പ്രമുഖരായ പുരി ജഗന്നാഥ്, ബോയപാട്ടി ശ്രീനു, കെ.വി. റെഡി, സിംഗീതം ശ്രീനിവാസ റാവു തുടങ്ങിയവരെയും ഒഴിവാക്കിയിട്ടുണ്ട്. നിലവിൽ താൻ സിനിമ ചെയ്യുന്ന സംവിധായകൻ അറ്റ്ലിയെ ചുവരിൽ ഉൾപ്പെടുത്തിയത്, അല്ലു അർജുൻ തന്റെ വ്യക്തിപരമായ താല്പര്യങ്ങൾക്കനുസരിച്ചാണ് പട്ടിക തയ്യാറാക്കിയതെന്ന വിമർശനത്തിന് ഇടയാക്കി. “രാം ഗോപാൽ വർമ്മയുടെ സിനിമാ ചരിത്രമില്ലാതെ ഇന്ത്യൻ സിനിമയെക്കുറിച്ച് സംസാരിക്കാനാകില്ല” എന്നാണ് എക്സ് പ്ലാറ്റ്ഫോമിലെ ഒരു ഉപയോക്താവ് കുറിച്ചത്.
ഹൈദരാബാദിലെ കോക്കാപേട്ടിലുള്ള അല്ലു സ്റ്റുഡിയോ കോംപ്ലക്സിനുള്ളിലാണ് ഈ അത്യാധുനിക തിയേറ്റർ സ്ഥിതി ചെയ്യുന്നത്. ഏകദേശം 75 അടി വീതിയുള്ള സ്ക്രീനാണ് ഇവിടെയുള്ളത്. ഇന്ത്യയിലെ ഏറ്റവും വലുതും ലോകത്തിലെ രണ്ടാമത്തെ വലുതുമായ ഡോൾബി സിനിമാ സ്ക്രീനാണിതെന്നാണ് റിപ്പോർട്ട്. മാർച്ച് 18-ന് ‘ധുരന്ധർ 2’ എന്ന ചിത്രത്തിന്റെ പ്രിവ്യൂവോട് കൂടി തിയേറ്റർ പൊതുജനങ്ങൾക്കായി തുറന്നുകൊടുക്കും.
Summary: Allu Arjun’s newly inaugurated “Allu Cinemas” in Hyderabad has sparked controversy over its “Wall of Greats,” which honors legendary directors. Fans and social media users were quick to notice the absence of iconic filmmakers like Ram Gopal Varma and Shankar, while newer directors like Atlee and Sandeep Reddy Vanga were included.
