മുംബൈ: മകൾ റാഹയുടെ ജനനത്തിന് ശേഷം തന്റെ സ്വകാര്യ ജീവിതം കൂടുതൽ വ്യക്തിപരമായി മാറിയെന്നും സോഷ്യൽ മീഡിയ ഉപേക്ഷിക്കാൻ പലതവണ ആഗ്രഹിച്ചിരുന്നുവെന്നും ബോളിവുഡ് നടി ആലിയ ഭട്ട് (Alia Bhatt interview). മാതൃത്വം ശാരീരികമായും മാനസികമായും തന്നിൽ വലിയ മാറ്റങ്ങൾ ഉണ്ടാക്കിയെന്ന് താരം വെളിപ്പെടുത്തി.
“അമ്മയായതിന് ശേഷം സോഷ്യൽ മീഡിയ അക്കൗണ്ടുകൾ ഡിലീറ്റ് ചെയ്യണമെന്നും വെറുമൊരു അഭിനേത്രിയായി മാത്രം തുടരണമെന്നും ആഗ്രഹിച്ച ദിവസങ്ങളുണ്ടായിരുന്നു. എന്നാൽ തുടക്കം മുതൽ എന്നെ പിന്തുണച്ച ഒരുപാട് പേരുമായുള്ള ബന്ധം അറുത്തുമുറിക്കാൻ എനിക്ക് താല്പര്യമില്ലാത്തതിനാലാണ് അങ്ങനെ ചെയ്യാത്തത്.”
“എന്റെ ഫോണിലെ ഫോട്ടോ ആൽബം ഇപ്പോൾ റാഹയുടെ ചിത്രങ്ങൾ കൊണ്ട് നിറഞ്ഞിരിക്കുകയാണ്. സ്വന്തമായി ഒരു ഫോട്ടോ എടുക്കാൻ പോലും ഇപ്പോൾ വലിയ പരിശ്രമം നടത്തേണ്ടി വരുന്നു. സ്വകാര്യ ജീവിതം ഇപ്പോൾ അത്രമേൽ വ്യക്തിപരമായി മാറി.”
മാതൃത്വം തന്നിൽ വലിയൊരു പരിവർത്തനമാണ് ഉണ്ടാക്കിയത്. അത് വാക്കുകൾക്ക് അപ്പുറമാണെന്നും ആലിയ കൂട്ടിച്ചേർത്തു.
2022 നവംബർ 6-നാണ് ആലിയ ഭട്ടിനും രൺബീർ കപൂറിനും മകൾ റാഹ ജനിച്ചത്. റാഹയുടെ ജനനശേഷം സിനിമകളിൽ സജീവമാണെങ്കിലും മകളുടെ സ്വകാര്യതയ്ക്ക് വലിയ പ്രാധാന്യമാണ് ഈ താരദമ്പതികൾ നൽകുന്നത്. ഇടക്കാലത്ത് മകളുടെ ചിത്രം പാപ്പരാസികൾക്ക് മുന്നിൽ വെളിപ്പെടുത്തിയത് വലിയ വാർത്തയായിരുന്നു.
