ന്യൂഡല്‍ഹി: ഡല്‍ഹിയിലെ വായുവിന്റെ ഗുണനിലവാരം വളരെ മോശം നിലയിൽ തുടരുന്നു. തലസ്ഥാനത്ത് നേരിയ മഴ പെയ്യുമെന്ന് കാലാവസ്ഥാ വകുപ്പ് പ്രവചിച്ചതിനാല്‍ ഇത് മെച്ചപ്പെടാന്‍ സാധ്യതയുണ്ട്. കേന്ദ്ര മലിനീകരണ നിയന്ത്രണ ബോര്‍ഡില്‍ (സിപിസിബി) ലഭ്യമായ ഡാറ്റ പ്രകാരം, തിങ്കളാഴ്ച രാവിലെ 6 മണിക്ക് വായുവിന്റെ ഗുണനിലവാര സൂചിക (എക്യുഐ) 315 ആയി രേഖപ്പെടുത്തി.
സിപിസിബി വികസിപ്പിച്ച മൊബൈല്‍ ആപ്ലിക്കേഷനായ സമീര്‍ ആപ്പ് പ്രകാരം, അയല്‍പക്ക നോയിഡയിലും ഗാസിയാബാദിലും വായു ഗുണനിലവാര സൂചിക (എക്യുഐ) വളരെ മോശം വിഭാഗത്തില്‍ തുടർന്ന് യഥാക്രമം 331 ഉം 321 ഉം ആയിരുന്നു. ഗ്രേറ്റര്‍ നോയിഡയിലും (288) ഗുരുഗ്രാമിലും (244) വായു ഗുണനിലവാര സൂചിക (എക്യുഐ) അല്പം മെച്ചപ്പെട്ടിട്ടുണ്ട്. ഫരീദാബാദില്‍ ഇത് 'മിതമായ' വിഭാഗത്തിലായിരുന്നു, തിങ്കളാഴ്ച രാവിലെ 6 മണിക്ക് 198 ആയി രേഖപ്പെടുത്തിയിട്ടുണ്ട്.
സിപിസിബിയുടെ റിപ്പോർട്ടനുസരിച്ച്, പൂജ്യത്തിനും 50 നും ഇടയിലുള്ള എക്യുഐ 'നല്ലത്', 51 നും 100 നും ഇടയിലുള്ളത് 'തൃപ്തികരമാണ്', 101 നും 200 നും 'മിതമായത്', 201 നും 300 നും 'മോശം', 301 നും 400 നും 'വളരെ മോശം', 401 നും 500 നും 'ഗുരുതരം' എന്നിങ്ങനെയാണ് കണക്കാക്കുന്നത്.
ഒക്ടോബര്‍ 27 ന് ഡല്‍ഹിയിലും സമീപ പ്രദേശങ്ങളിലും നേരിയ മഴയോ ചാറ്റല്‍ മഴയോ ഉണ്ടാകുമെന്ന് ഇന്ത്യന്‍ കാലാവസ്ഥാ വകുപ്പ് പ്രവചിച്ചിട്ടുണ്ട്. അതിനാൽ, ഡല്‍ഹിയിലും സമീപ പ്രദേശങ്ങളിലും വായുവിന്റെ ഗുണനിലവാരം മെച്ചപ്പെടുമെന്നാണ് പ്രതീക്ഷ. തിങ്കളാഴ്ച പരമാവധി താപനില 29 ഡിഗ്രി സെല്‍ഷ്യസും കുറഞ്ഞ താപനില 18 ഡിഗ്രി സെല്‍ഷ്യസും ആയിരിക്കുമെന്നും റിപ്പോര്‍ട്ടില്‍ പറയുന്നു.