ന്യൂഡൽഹി: ഡൽഹിയിലെ വായു മലിനീകരണ തോത് കുറഞ്ഞ സാഹചര്യത്തിൽ ഏർപ്പെടുത്തിയിരുന്ന കർശന നിയന്ത്രണങ്ങളിൽ സർക്കാർ ഇളവ് പ്രഖ്യാപിച്ചു. വായു ഗുണനിലവാര സൂചിക (AQI) മെച്ചപ്പെട്ടതിനെത്തുടർന്ന് ഗ്രേഡഡ് റെസ്പോൺസ് ആക്ഷൻ പ്ലാനിന്റെ നാലാം ഘട്ട നിയന്ത്രണങ്ങൾ പിൻവലിക്കാൻ സർക്കാർ തീരുമാനിച്ചു.(Air pollution, Restrictions eased in Delhi)
ആറാം ക്ലാസ് മുതലുള്ള കുട്ടികൾക്ക് ഓൺലൈൻ ക്ലാസുകൾ ഒഴിവാക്കി നേരിട്ടുള്ള അധ്യയനം പുനരാരംഭിക്കും. എന്നാൽ അഞ്ചാം ക്ലാസ് വരെയുള്ള കുട്ടികൾക്ക് ഓൺലൈൻ, ഓഫ്ലൈൻ രീതികൾ ചേർന്നുള്ള 'ഹൈബ്രിഡ്' മോഡിൽ ക്ലാസുകൾ തുടരാവുന്നതാണ്.
കഴിഞ്ഞ രണ്ടുദിവസമായി ഡൽഹിയിലെ ശരാശരി വായു ഗുണനിലവാര സൂചിക 250-ന് താഴെ തുടരുകയാണ്. ഇതാണ് നിയന്ത്രണങ്ങൾ നീക്കാൻ അധികൃതരെ പ്രേരിപ്പിച്ചത്. വലിയ ഇളവുകൾ പ്രഖ്യാപിച്ചെങ്കിലും വാഹനങ്ങൾക്കും നിർമ്മാണ പ്രവർത്തനങ്ങൾക്കും ഏർപ്പെടുത്തിയിട്ടുള്ള നിയന്ത്രണങ്ങൾ തുടരുമെന്ന് സർക്കാർ വ്യക്തമാക്കിയിട്ടുണ്ട്. മലിനീകരണം വീണ്ടും വർധിക്കാതിരിക്കാനുള്ള മുൻകരുതൽ നടപടിയാണിത്.