ന്യൂഡൽഹി: ദേശീയ തലസ്ഥാനത്തെ ശ്വാസം മുട്ടിക്കുന്ന വായു മലിനീകരണം നിയന്ത്രിക്കുന്നതിനായി ഡൽഹി സർക്കാർ പ്രഖ്യാപിച്ച കർശന നിയന്ത്രണങ്ങൾ ഇന്നുമുതൽ പ്രാബല്യത്തിൽ വന്നു. നഗരത്തിലേക്ക് പ്രവേശിക്കുന്ന വാഹനങ്ങൾക്ക് ബിഎസ്-6 (BS-VI) എഞ്ചിൻ മാനദണ്ഡം നിർബന്ധമാക്കി. മലിനീകരണ നിയന്ത്രണ സർട്ടിഫിക്കറ്റ് (PUC) ഇല്ലാത്ത വാഹനങ്ങൾക്ക് പെട്രോൾ പമ്പുകളിൽ നിന്ന് ഇന്ധനം നൽകില്ലെന്നും അധികൃതർ അറിയിച്ചു.(Air pollution is severe, Strict restrictions in Delhi from today)
പുതിയ നിയമം നടപ്പിലാകുന്നതോടെ ഡൽഹിയുടെ അയൽ നഗരങ്ങളായ നോയിഡ, ഗുഡ്ഗാവ്, ഗാസിയാബാദ്, ഫരീദാബാദ് എന്നിവിടങ്ങളിൽ നിന്ന് എത്തുന്ന വാഹനങ്ങൾ പ്രതിസന്ധിയിലാകും. ഏകദേശം 12 ലക്ഷത്തോളം വാഹനങ്ങളെ ഈ നിയന്ത്രണം നേരിട്ട് ബാധിക്കുമെന്നാണ് കണക്കാക്കുന്നത്. മലിനീകരണ സർട്ടിഫിക്കറ്റ് ഇല്ലാത്ത വാഹനങ്ങളെ കണ്ടെത്താൻ പെട്രോൾ പമ്പുകളിൽ ഓട്ടോമാറ്റിക് നമ്പർ പ്ലേറ്റ് റെക്കഗ്നിഷൻ ക്യാമറകൾ സ്ഥാപിച്ചു.
മലിനീകരണ തോത് കുറയുന്നത് വരെ (ഗ്രേഡഡ് റെസ്പോൺസ് ആക്ഷൻ പ്ലാൻ - ഘട്ടം 4) നിയന്ത്രണങ്ങൾ തുടരുമെന്ന് പരിസ്ഥിതി മന്ത്രി മജീന്ദർ സിംഗ് സിർസ വ്യക്തമാക്കി. നിയന്ത്രണങ്ങൾ ലംഘിക്കുന്നവരെ കണ്ടെത്താൻ വൻ പോലീസ് സന്നാഹത്തെയാണ് നഗരത്തിൽ വിന്യസിച്ചിരിക്കുന്നത്. 126 കേന്ദ്രങ്ങളിലായി 580 പോലീസ് ഉദ്യോഗസ്ഥരെ നിയോഗിച്ചു. 37 എൻഫോഴ്സ്മെന്റ് വാനുകൾ നഗരത്തിൽ പരിശോധന നടത്തും.
പെട്രോൾ പമ്പുകളിൽ ട്രാൻസ്പോർട്ട് ഡിപ്പാർട്ട്മെന്റ്, മുനിസിപ്പൽ കോർപ്പറേഷൻ എന്നിവയുടെ പ്രത്യേക സംഘങ്ങൾ നേരിട്ടെത്തി പരിശോധന ഉറപ്പാക്കും. ഇന്ന് പുലർച്ചെ ഡൽഹിയിലെ ശരാശരി വായു ഗുണനിലവാര സൂചിക (AQI) 356 രേഖപ്പെടുത്തി. ഇത് 'വളരെ മോശം' എന്ന വിഭാഗത്തിലാണ്. ആനന്ദ് വിഹാറിൽ സൂചിക 415 കടന്നതോടെ വായുനിലവാരം 'അതിതീവ്രം' (Severe) എന്ന നിലയിലായി. പുകമഞ്ഞ് കനത്തതോടെ നജാഫ്ഗഡ് പോലുള്ള മേഖലകളിൽ കാഴ്ചപരിധി കുറഞ്ഞത് ഗതാഗതത്തെ ബാധിച്ചിട്ടുണ്ട്. തിരക്കേറിയ പ്രദേശങ്ങളിലെ വായു മലിനീകരണത്തിൽ 40 ശതമാനവും വാഹനങ്ങൾ മൂലമാണെന്നാണ് കണ്ടെത്തൽ. ഈ സാഹചര്യത്തിൽ ജനങ്ങൾ നിയന്ത്രണങ്ങളുമായി സഹകരിക്കണമെന്ന് സർക്കാർ അഭ്യർത്ഥിച്ചു.