ന്യൂഡൽഹി: ഡൽഹി വിമാനത്താവളത്തിൽ ബോർഡിംഗ് ക്യൂവിനെച്ചൊല്ലിയുള്ള തർക്കത്തിനിടെ യാത്രക്കാരനെ എയർ ഇന്ത്യ (Air India) പൈലറ്റ് ക്രൂരമായി മർദിച്ചു. മക്കളുടെ മുന്നിൽവെച്ച് അതിക്രമം നേരിട്ട അങ്കിത് ധവാൻ എന്ന യാത്രക്കാരൻ ചോരയൊലിപ്പിക്കുന്ന മുഖത്തിന്റെ ചിത്രം സമൂഹമാധ്യമങ്ങളിൽ പങ്കുവെച്ചതോടെയാണ് സംഭവം പുറംലോകമറിഞ്ഞത്. പരാതിക്ക് പിന്നാലെ പൈലറ്റ് വിജേന്ദർ സെജ്വാളിനെ ഔദ്യോഗിക ചുമതലകളിൽ നിന്ന് മാറ്റിനിർത്തി.
നാല് മാസം പ്രായമുള്ള കുഞ്ഞുമായി എത്തിയ അങ്കിതിനോട് ജീവനക്കാർക്കുള്ള ക്യൂ ഉപയോഗിക്കാൻ വിമാനത്താവള ഉദ്യോഗസ്ഥർ നിർദ്ദേശിച്ചിരുന്നു. എന്നാൽ പൈലറ്റും സംഘവും ക്യൂ പാലിക്കാതെ മുന്നിൽ കയറാൻ ശ്രമിച്ചത് അങ്കിത് ചോദ്യം ചെയ്തതാണ് അക്രമത്തിൽ കലാശിച്ചത്. "നിനക്ക് വിദ്യാഭ്യാസമില്ലേ" എന്ന് ചോദിച്ചുകൊണ്ട് ക്യാപ്റ്റൻ വിജേന്ദർ അങ്കിതിനെ മർദിക്കുകയായിരുന്നു. ഏഴ് വയസ്സുകാരിയായ മകളും പിതാവിന് മർദനമേൽക്കുന്നത് കണ്ട് തളർന്നുപോയി.
സംഭവത്തിൽ പരാതിയില്ലെന്ന് തന്നെക്കൊണ്ട് നിർബന്ധിച്ച് എഴുതിവാങ്ങിയതായി അങ്കിത് ആരോപിച്ചു. എന്നാൽ ചിത്രം വൈറലായതോടെ എയർ ഇന്ത്യ അന്വേഷണത്തിന് ഉത്തരവിടുകയായിരുന്നു. വിഷയം ഗൗരവമായി കാണുന്നുവെന്നും അന്വേഷണത്തിന് ശേഷം കർശന നടപടി സ്വീകരിക്കുമെന്നും എയർ ഇന്ത്യ വക്താവ് അറിയിച്ചു. മക്കളുടെ മുന്നിൽവെച്ച് ഒരു യാത്രക്കാരനെ വിമാനക്കമ്പനി ജീവനക്കാരൻ തന്നെ മർദിച്ചത് വലിയ പ്രതിഷേധത്തിന് കാരണമായിട്ടുണ്ട്.
An Air India pilot, Vijender Sejwal, has been de-rostered after he allegedly assaulted a passenger, Ankit Dhawan, in front of his seven-year-old daughter at Delhi Airport. The dispute began when Dhawan questioned the pilot and his crew for jumping the boarding queue, despite staff directing Dhawan to the priority line as he was traveling with an infant. After Dhawan posted photos of his bloodied face on social media and alleged that he was forced to sign a no-complaint statement, Air India initiated a probe into the incident.