മുംബൈ: അമേരിക്കയിലെ നെവാർക്കിലേക്ക് പോകാൻ പറന്നുയർന്ന എയർ ഇന്ത്യ വിമാനം സാങ്കേതിക തകരാറിനെ തുടർന്ന് മുംബൈയിൽ തന്നെ തിരിച്ചിറക്കി. ജീവനക്കാരുടെ ജാഗ്രതയെത്തുടർന്ന് വിമാനം സുരക്ഷിതമായി തിരിച്ചിറക്കിയതായി എയർലൈൻ പുറത്തിറക്കിയ പ്രസ്താവനയിൽ അറിയിച്ചു. യാത്രക്കാരെല്ലാം സുരക്ഷിതരാണ്.(Air India flight from Mumbai returns due to technical snag)
ഇന്ന് രാവിലെ മുംബൈ വിമാനത്താവളത്തിൽ നിന്ന് നെവാർക്കിലേക്ക് യാത്ര നിശ്ചയിച്ചിരുന്ന എഐ 191 വിമാനമാണ് തകരാർ കണ്ടെത്തിയതിനെത്തുടർന്ന് തിരിച്ചിറക്കിയത്. വിമാനത്തിലെ തകരാർ പരിഹരിക്കാനുള്ള ശ്രമം തുടങ്ങിയതായും എയർ ഇന്ത്യ അറിയിച്ചു.
സംഭവത്തെത്തുടർന്ന് വിമാനത്തിന്റെ സർവീസ് റദ്ദാക്കിയിട്ടുണ്ട്. ഇതോടെ നെവാർക്കിൽ നിന്ന് മുംബൈയിലേക്കുള്ള എയർ ഇന്ത്യ വിമാനവും റദ്ദാക്കി. ഷെഡ്യൂൾ പ്രകാരം മുംബൈയിൽ നിന്ന് 01:10 ന് (IST) പുറപ്പെട്ട് 07:55 ന് (EDT) നെവാർക്കിൽ എത്തിച്ചേരേണ്ട വിമാനമായിരുന്നു ഇത്.
എല്ലാ യാത്രക്കാർക്കും ഹോട്ടലിൽ താമസസൗകര്യം ഒരുക്കിയതായി എയർ ഇന്ത്യ അറിയിച്ചു. യാത്രക്കാരിൽ ചിലർക്ക് എയർ ഇന്ത്യയുടെയും മറ്റ് എയർലൈനുകളുടെയും ഇതര വിമാനങ്ങളിൽ യാത്രാസൗകര്യം ഏർപ്പെടുത്തി. യാത്രക്കാരുടെയും ജീവനക്കാരുടെയും സുരക്ഷയും ക്ഷേമവുമാണ് തങ്ങളുടെ മുൻഗണനയെന്നും അതിനാലാണ് സർവീസ് റദ്ദാക്കിയതെന്നും എയർ ഇന്ത്യ വ്യക്തമാക്കി. വിമാനത്തിൽ ഇന്ത്യക്കാരടക്കം നിരവധി യാത്രക്കാർ ഉണ്ടായിരുന്നു എന്നാണ് വിവരം.