ന്യൂഡൽഹി: വിവിധ സംസ്ഥാനങ്ങളിൽ ബംഗാളി കുടിയേറ്റ തൊഴിലാളികൾക്ക് നേരെ വർധിച്ചുവരുന്ന ആക്രമണങ്ങളിൽ ആശങ്ക പ്രകടിപ്പിച്ച് മുതിർന്ന കോൺഗ്രസ് നേതാവ് അധിർ രഞ്ജൻ ചൗധരി. ബിജെപി ഭരിക്കുന്ന സംസ്ഥാനങ്ങളിലാണ് പീഡനങ്ങൾ കൂടുതലെന്ന് ചൂണ്ടിക്കാട്ടി അദ്ദേഹം പ്രധാനമന്ത്രി നരേന്ദ്ര മോദിക്ക് കത്ത് നൽകി. ബുധനാഴ്ച പ്രധാനമന്ത്രിയെ കണ്ട് ചൗധരി വിഷയത്തിന്റെ ഗൗരവം ധരിപ്പിച്ചു.(Adhir Ranjan Chowdhury about Attacks On Bengali Speakers To PM Modi)
ബംഗാളി ഭാഷ സംസാരിക്കുന്നു എന്നത് മാത്രമാണ് ഈ തൊഴിലാളികൾ നേരിടുന്ന പ്രശ്നം. ഇവരെ ബംഗ്ലാദേശികളായി തെറ്റിദ്ധരിച്ച് നുഴഞ്ഞുകയറ്റക്കാരായി മുദ്രകുത്തുന്ന പ്രവണത ഭരണകൂടങ്ങളുടെ ഭാഗത്തുനിന്നുണ്ടാകുന്നു. കുടിയേറ്റ തൊഴിലാളികൾക്ക് നേരെയുള്ള ഇത്തരം വിവേചനങ്ങൾ അതിർത്തി പങ്കിടുന്ന പശ്ചിമ ബംഗാളിലെ വിവിധ സമൂഹങ്ങൾക്കിടയിൽ വർഗീയ സംഘർഷങ്ങൾക്ക് കാരണമാകുമെന്ന് അദ്ദേഹം മുന്നറിയിപ്പ് നൽകി.
ബംഗാളി കുടിയേറ്റ തൊഴിലാളികൾക്കെതിരായ അക്രമങ്ങളും വിവേചനവും അവസാനിപ്പിക്കാൻ എല്ലാ സംസ്ഥാന സർക്കാരുകൾക്കും നിർദ്ദേശം നൽകണമെന്ന് അദ്ദേഹം പ്രധാനമന്ത്രിയോട് ആവശ്യപ്പെട്ടു. ഒഡീഷയിലെ സംബാൽപുരിൽ മുർഷിദാബാദ് സ്വദേശിയായ ജ്വുവൽ റാണ എന്ന കുടിയേറ്റ തൊഴിലാളി കൊല്ലപ്പെട്ട സംഭവം അദ്ദേഹം കത്തിൽ പരാമർശിച്ചു. ബംഗ്ലാദേശികളാണെന്ന സംശയത്തിൽ മുംബൈയിൽ തൊഴിലാളികളെ അറസ്റ്റ് ചെയ്തതും ചർച്ചയായി. പശ്ചിമ ബംഗാൾ മൈഗ്രന്റ്സ് വെൽഫെയർ ബോർഡിന് കഴിഞ്ഞ 10 മാസത്തിനിടെ 1,143 പരാതികളാണ് ഇത്തരത്തിൽ ലഭിച്ചിട്ടുള്ളതെന്നും അദ്ദേഹം ചൂണ്ടിക്കാട്ടി.
പ്രധാനമന്ത്രിയുമായുള്ള കൂടിക്കാഴ്ചയ്ക്ക് ശേഷം, വിഷയം പരിഗണിക്കാമെന്ന് അദ്ദേഹം ഉറപ്പുനൽകിയതായി അധിർ രഞ്ജൻ ചൗധരി മാധ്യമങ്ങളോട് പറഞ്ഞു. പാർലമെന്റിൽ ഉൾപ്പെടെ പലതവണ ഈ വിഷയം ഉന്നയിച്ചിട്ടും കാര്യമായ നടപടികൾ ഉണ്ടാകുന്നില്ലെന്നും അദ്ദേഹം കുറ്റപ്പെടുത്തി.