ശ്രീനഗർ: ജമ്മു കശ്മീരിലെ ശ്രീനഗറിനടുത്തുള്ള നൗഗാം പോലീസ് സ്റ്റേഷനിൽ സൂക്ഷിച്ചിരുന്ന സ്ഫോടകവസ്തുക്കൾ വെള്ളിയാഴ്ച രാത്രി പൊട്ടിത്തെറിച്ചതിനെ തുടർന്ന് വൻ ദുരന്തം. സംഭവത്തിൽ ഒമ്പത് പേർ കൊല്ലപ്പെടുകയും 32 പേർക്ക് പരിക്കേൽക്കുകയും ചെയ്തു.(Accidental explosion, DGP on Nowgam police station blast)
കൊല്ലപ്പെട്ടവരിൽ ഭൂരിഭാഗവും സ്ഫോടകവസ്തുക്കൾ പരിശോധിച്ചുകൊണ്ടിരുന്ന പോലീസുകാരും ഫോറൻസിക് ടീം ഉദ്യോഗസ്ഥരുമാണ്. ഡൽഹി ചെങ്കോട്ട സ്ഫോടനവുമായി ബന്ധപ്പെട്ട് ഹരിയാനയിലെ ഫരീദാബാദിൽ നിന്ന് അടുത്തിടെ കണ്ടെത്തിയ അമോണിയം നൈട്രേറ്റ് ഉൾപ്പെടെയുള്ള സ്ഫോടകവസ്തുക്കളുടെ ഭാഗമായിരുന്നു നൗഗാം പോലീസ് സ്റ്റേഷനിൽ സൂക്ഷിച്ചിരുന്നത്. കൊല്ലപ്പെട്ടവരിൽ സംസ്ഥാന ക്രൈം ബ്രാഞ്ചിൻ്റെ രണ്ട് വീഡിയോഗ്രാഫർമാരും ഉൾപ്പെടുന്നുണ്ട്. സ്ഫോടകവസ്തുക്കളുടെ പരിശോധനയുടെ ദൃശ്യങ്ങൾ പകർത്തുന്നതിനിടെയാണ് ഇവർ അപകടത്തിൽപ്പെട്ടത്.
ഈ സംഭവം "ആകസ്മികം" ആണെന്ന് ജമ്മു കശ്മീർ ഡയറക്ടർ ജനറൽ ഓഫ് പോലീസ് (ഡിജിപി) നളിൻ പ്രഭാത് മാധ്യമങ്ങളെ അഭിസംബോധന ചെയ്തുകൊണ്ട് വ്യക്തമാക്കി. "ഈ സംഭവത്തിൻ്റെ കാരണത്തെക്കുറിച്ച് മറ്റേതെങ്കിലും ഊഹാപോഹങ്ങൾ അനാവശ്യമാണ്," അദ്ദേഹം പറഞ്ഞു. സ്ഫോടനം തീവ്രവാദ ആക്രമണമല്ല, മറിച്ച് സാങ്കേതിക പിഴവ് മൂലമുണ്ടായ അപകടമാണെന്ന സൂചനയാണ് ഡിജിപി നൽകുന്നത്.
ചെങ്കോട്ടയ്ക്ക് സമീപം ഒരു കാറിൽ ഉണ്ടായ സ്ഫോടനത്തിൽ 13 പേർ കൊല്ലപ്പെടുകയും 20-ൽ അധികം പേർക്ക് പരിക്കേൽക്കുകയും ചെയ്ത സംഭവത്തിന് ദിവസങ്ങൾക്കകമാണ് രണ്ടാമത്തെ സ്ഫോടനം ഉണ്ടാകുന്നത്. അതേസമയം, സംഭവത്തിൽ സ്ഫോടനം നടത്തിയെന്ന അവകാശവാദവുമായി ജെയ്ഷെ മുഹമ്മദിൻ്റെ നിഴൽ സംഘടന രംഗത്തെത്തിയിരുന്നു.