ലുധിയാന: കാനഡയിൽ കാറപകടത്തിൽ മരിച്ചുവെന്ന് ആദ്യം അറിയിപ്പ് ലഭിച്ച ലുധിയാന സ്വദേശിയായ യുവതിയുടെ മരണം കൊലപാതകമാണെന്ന് തെളിഞ്ഞതിന്റെ ഞെട്ടലിലാണ് കുടുംബം. കേസിൽ ഭർത്താവിന്റെ സഹോദരനാണ് പ്രതിയെന്ന വിവരം കൂടി ലഭിച്ചതോടെ മകൾക്ക് നീതി ലഭിക്കാൻ നിയമപോരാട്ടത്തിനൊരുങ്ങുകയാണ് യുവതിയുടെ കുടുംബം.('Accidental death' of Indian-origin woman in Canada has been a murder)
ലുധിയാന സ്വദേശിയായ മൻദീപ് കൗർ (30) കാറപകടത്തിൽ മരിച്ചു എന്നായിരുന്നു ആദ്യം കുടുംബത്തിന് ലഭിച്ച വിവരം. ഒക്ടോബർ 26-ന് ഡെൽറ്റയിൽ ഹൈവേ 17-ൽ ഉണ്ടായ വാഹനാപകടത്തിലാണ് മൻദീപ് മരിച്ചത്. മൻദീപിന്റെ ഭർത്താവിന്റെ സഹോദരനായ ഗുർജോത് സിങിനെ (24) പ്രതിചേർത്തെന്നാണ് ഇപ്പോൾ കുടുംബത്തിന് ലഭിച്ച വിവരം. നവംബർ 6-നാണ് ഗുർജോതിനെ അറസ്റ്റ് ചെയ്തത്.
ഭർത്താവിന്റെ സഹോദരനെതിരെ മൃതദേഹത്തോട് അനാദരവ് കാണിച്ചു എന്ന കുറ്റമായിരുന്നു ആദ്യം ചുമത്തിയിരുന്നത്. പിന്നീട് കൊലപാതകക്കുറ്റം കൂടി ചുമത്തുകയായിരുന്നു. മൻദീപിന്റെ ചിതാഭസ്മം നിമജ്ജനം ചെയ്ത ശേഷം വീട്ടിൽ തിരിച്ചെത്തിയപ്പോഴാണ് കേസിന്റെ ഈ പുതിയ വിവരങ്ങളെക്കുറിച്ച് അച്ഛൻ ജഗ്ദീപ് സിങ് അറിയുന്നത്. എങ്ങനെയാണ് അപകടം ഉണ്ടായതെന്നോ ഭർത്താവിന്റെ സഹോദരൻ എങ്ങനെയാണ് പ്രതിയായതെന്നോ കുടുംബത്തിന് വ്യക്തമല്ല.
മകൾ കൊല്ലപ്പെട്ടത് എങ്ങനെയെന്ന് അറിയണമെന്നും മകൾക്ക് നീതി കിട്ടണമെന്നും മൻദീപിന്റെ അമ്മ ജസ്വിന്ദർ കൗർ ആവശ്യപ്പെട്ടു. ആറ് വർഷം മുൻപാണ് ഉപരിപഠനത്തിനായി മൻദീപ് കാനഡയിലേക്ക് പോയത്. ഈ വർഷം മാർച്ച് 11-നായിരുന്നു മൻദീപിന്റെയും അൻമോൽ ജീത് സിങിന്റെയും വിവാഹം.