ഉത്തർപ്രദേശ്: ഉത്തർപ്രദേശിന്റെ തലസ്ഥാനമായ ലഖ്‌നൗവിൽ നിന്നും ഞെട്ടിക്കുന്ന ഒരു കൊലപാതകത്തിന്റെ വാർത്തയാണ് കഴിഞ്ഞ ദിവസം പുറത്ത് വന്നത്. ആറ് വയസ്സുള്ള മകളെ ഒരു അമ്മ ക്രൂരമായി കൊലപ്പെടുത്തുകയായിരുന്നു. കാമുകനൊപ്പം അമ്മയെ മോശം സാഹചര്യത്തിൽ കണ്ടുവെന്നതിന്റെ പേരിലാണ് പിഞ്ചു കുഞ്ഞിനെ സ്വന്തം 'അമ്മ കൊലപ്പെടുത്തിയത്. ഇക്കാര്യം അച്ഛനോട് പറയുമെന്ന് മകൾ അമ്മയോട് പറഞ്ഞതാണ് യുവതിയെ സ്വന്തം മകളെ കൊലപ്പെടുത്താൻ പ്രേരിപ്പിച്ചത്.
കുട്ടിയെ കിടക്കയിലേക്ക് തള്ളിയിട്ട്, കാമുകനൊപ്പം ചേർന്ന് ശ്വാസം മുട്ടിച്ച് കൊലപ്പെടുത്തുകയായിരുന്നു എന്നാണ് റിപ്പോർട്ട്. പിന്നാലെ, മൃതദേഹം കിടക്കയിൽ ഒളിപ്പിച്ച ശേഷം, അമ്മ കാമുകനോടൊപ്പം മദ്യപിക്കുകയും ലൈംഗിക ബന്ധത്തിൽ ഏർപ്പെടുകയും ചെയ്തതായും റിപ്പോർട്ടുണ്ട്.
ആറുവയസ്സുകാരിയായ സയൻറ എന്ന സോനയെ, അമ്മ റോഷ്‌നി ഖാൻ എന്ന നാസും, കാമുകൻ ഉദിത് ജയ്‌സ്വാളും ചേർന്നാണ് ക്രൂരമായി കൊലപ്പെടുത്തിയത്. ജൂലൈ 13 ന് രാത്രിയിലാണ് പെൺകുട്ടി കൊല്ലപ്പെട്ടതെന്നാണ് റിപ്പോർട്ട്. റോഷ്‌നിയുടെ മകൾ സയൻ‌റയ്ക്ക് ഉദിതിനെ ഇഷ്ടമല്ലായിരുന്നു. ഇയാൾ വീട്ടിൽ വരുന്നതും കുട്ടി എതിർത്തിരുന്നു. എല്ലാം അച്ഛനോട് പറയുമെന്ന് അമ്മയ്ക്ക് മുന്നറിയിപ്പ് നൽകുകയും ചെയ്യുമായിരുന്നു.
സംഭവദിവസം , രാത്രിയിൽ പെൺകുട്ടി ഉണർന്നപ്പോൾ അമ്മ കാമുകനോടൊപ്പം അശ്ലീല വസ്ത്രം ധരിച്ച് നൃത്തം ചെയ്യുന്നത് കണ്ടു. അമ്മ ആദ്യം പെൺകുട്ടിയെ തല്ലുകയും പിന്നീട് ദേഷ്യത്തിൽ അവളെ കട്ടിലിൽ എറിയുകയും വയറ്റിൽ ചവിട്ടുകയും ചെയ്തു. ശ്വാസം നിലയ്ക്കുന്നതുവരെ ഉദിത് പെൺകുട്ടിയുടെ വായ അമർത്തിപ്പിടിച്ചു. ഈ ദാരുണമായ കൊലപാതകത്തിനു ശേഷവും ഇരുവർക്കും ഒരു പശ്ചാത്താപവും തോന്നിയില്ല - പകരം അവർ മദ്യം, മാംസം, സംഗീതം എന്നിവയുമായി ആഘോഷിച്ചു.
കൊലപാതകത്തിനുശേഷം, പെൺകുട്ടിയുടെ മൃതദേഹം ഒരു കിടക്കപ്പെട്ടിയിൽ ഇട്ടു, അമ്മയും കാമുകനും ഒരേ കിടക്കയിൽ ഉറങ്ങി. അടുത്ത ദിവസം മൃതദേഹം ഉപേക്ഷിക്കാൻ പദ്ധതിയിട്ടു. ഗോമതി നദിയുടെ തീരത്ത് മൃതദേഹം ഉപേക്ഷിക്കാനും അവർ പദ്ധതിയിട്ടു, പക്ഷേ ഭയം കാരണം അത് നടന്നില്ല.
ജൂലൈ 14-15 രാത്രിയിൽ, റോഷ്‌നി പോലീസ് കൺട്രോൾ റൂമിലേക്ക് വിളിച്ച് തന്റെ ഭർത്താവ് ഷാരൂഖ് മകളെ കൊലപ്പെടുത്തിയതാണെന്ന് വ്യാജമായി ആരോപിച്ചു. എന്നാൽ പോലീസ് സ്ഥലത്തെത്തിയപ്പോൾ, അഴുകിയ മൃതദേഹത്തിന്റെ അവസ്ഥയും പോസ്റ്റ്‌മോർട്ടം റിപ്പോർട്ടും കൊലപാതകം രണ്ട് ദിവസം മുമ്പാണ് നടന്നതെന്ന് വ്യക്തമാക്കി. അന്വേഷണത്തിൽ, പോലീസിന് സംശയം തോന്നി, ചോദ്യം ചെയ്യലിൽ റോഷ്‌നിയും ഉദിത്തും കുറ്റം സമ്മതിച്ചു. ജൂലൈ 16 ന് ഇരുവരും അറസ്റ്റിലായി.