ചെന്നൈ: വെല്ലൂരിൽ ‘മായാന കൊല്ലൈ’ ഉത്സവത്തോടനുബന്ധിച്ചുള്ള രഥഘോഷയാത്രയ്ക്കിടെ വൻ അപകടം. നിയന്ത്രണം വിട്ട രഥം മറിഞ്ഞ് ഏഴ് പേർക്ക് ഗുരുതരമായി പരിക്കേറ്റു. ശിവരാത്രിക്ക് തൊട്ടുപിറ്റേന്ന് നടക്കുന്ന വെല്ലൂരിലെ പ്രധാന പ്രാദേശിക ആഘോഷത്തിനിടെയായിരുന്നു സംഭവം.(60-foot-tall chariot overturns during festival in Vellore, 7 people seriously injured)
ഏകദേശം 60 അടി ഉയരമുള്ള ഭീമാകാരമായ രഥമാണ് അപകടത്തിൽപ്പെട്ടത്. ഭക്തർ രഥം വലിച്ചുനീക്കുന്നതിനിടെ പെട്ടെന്ന് ബാലൻസ് തെറ്റി മറിയുകയായിരുന്നു. രഥത്തിനടിയിൽ പെട്ടുപോയവരെ നാട്ടുകാരും പോലീസും ചേർന്ന് അതിസാഹസികമായാണ് പുറത്തെടുത്തത്.
പരിക്കേറ്റവരെ ഉടൻ തന്നെ സമീപത്തെ ആശുപത്രിയിൽ പ്രവേശിപ്പിച്ചു. ഇവരിൽ പലരുടെയും നില അതീവ ഗുരുതരമായി തുടരുകയാണ്. ക്ഷേത്ര ഉത്സവങ്ങളുമായി ബന്ധപ്പെട്ട് ജില്ലാ ഭരണകൂടം നൽകുന്ന കർശന സുരക്ഷാ മാനദണ്ഡങ്ങൾ ലംഘിക്കപ്പെട്ടിട്ടുണ്ടോ എന്ന് അധികൃതർ പരിശോധിച്ചുവരികയാണ്.
