ന്യൂഡൽഹി: വീട് പണയപ്പെടുത്തിയും കൈവശമുണ്ടായിരുന്ന ഭൂമി വിറ്റും സ്വരുക്കൂട്ടിയ പണം ഉപയോഗിച്ച് അമേരിക്കയിലേക്ക് പോയ 50 ഹരിയാന സ്വദേശികളെ അനധികൃത കുടിയേറ്റത്തെ തുടർന്ന് ഇന്ത്യയിലേക്ക് തിരിച്ചയച്ചു. 25-നും 40-നും ഇടയിൽ പ്രായമുള്ള പുരുഷന്മാരാണ് സംഘത്തിലുള്ളത്.(50 Haryana nationals who entered the US illegally were deported)
ആകെ 54 പേർ അടങ്ങുന്ന സംഘമാണ് ഞായറാഴ്ച ഇന്ത്യയിൽ തിരിച്ചെത്തിയത്. ഹരിയാനയിൽ നിന്നുള്ള 50 പേരിൽ 16 പേർ കർണാലിൽ നിന്നും 14 പേർ കൈത്താലിൽ നിന്നും 5 പേർ കുരുക്ഷേത്രയിൽ നിന്നും ഒരാൾ പാനിപ്പത്തിൽ നിന്നുമുള്ളവരാണ്.
മെക്സിക്കോ വഴിയാണ് ഇവർ അമേരിക്കയിൽ എത്തിയത്. ഇവരിൽ പലരും വർഷങ്ങളായി അമേരിക്കയിൽ താമസിക്കുന്നവരാണ്. ചിലർ ഏതാനും മാസങ്ങൾക്ക് മുൻപ് മാത്രം എത്തിയവരാണ്. തിരിച്ചെത്തിയ 50 പേരിൽ പലർക്കും അമേരിക്കൻ ജയിലിൽ കഴിയേണ്ടി വന്നിട്ടുണ്ട്.
ഏജൻ്റുമാർക്ക് ലക്ഷക്കണക്കിന് രൂപ കൈക്കൂലി നൽകിയാണ് ഇവർ അമേരിക്കയിലേക്ക് കടന്നത്. ഈ യാത്രയ്ക്ക് ഏകദേശം നാല് മാസത്തോളം സമയമെടുത്തു. ഹരിയാനയിൽ നിന്നുള്ള യുവാക്കൾക്ക് പുറമെ, പഞ്ചാബ്, ഹൈദരാബാദ്, ഗുജറാത്ത്, ഗോവ എന്നിവിടങ്ങളിൽ നിന്നുള്ളവരും ഇതേ വിമാനത്തിൽ ഉണ്ടായിരുന്നു. എന്നാൽ ഇവരുടെ പേരുവിവരങ്ങളോ മറ്റ് വിശദാംശങ്ങളോ പുറത്തുവിട്ടിട്ടില്ല.