ഭുവനേശ്വർ: ഒഡീഷയിലെ കന്ധമാൽ-ഗഞ്ചം ജില്ലാ അതിർത്തിയിലുണ്ടായ ശക്തമായ ഏറ്റുമുട്ടലിൽ മാവോയിസ്റ്റ് സെൻട്രൽ കമ്മിറ്റി അംഗവും മുതിർന്ന കമാൻഡറുമായ ഗണേഷ് ഉയ്ക്കേ ഉൾപ്പെടെ നാല് മാവോവാദികളെ സുരക്ഷാസേന വധിച്ചു. വ്യാഴാഴ്ച രാവിലെ റാംപ വനമേഖലയിൽ ബി.എസ്.എഫും സി.ആർ.പി.എഫും സംയുക്തമായി നടത്തിയ ഓപ്പറേഷനിലാണ് ഇവരെ വധിച്ചത്. കൊല്ലപ്പെട്ടവരിൽ രണ്ട് സ്ത്രീകളും ഉൾപ്പെടുന്നു.(4 people including Maoist commander who had announced a bounty of Rs 1.1 crore on his head killed in Odisha )
രഹസ്യവിവരത്തെത്തുടർന്ന് വനമേഖലയിൽ പരിശോധനയ്ക്കെത്തിയ സുരക്ഷാസേനയ്ക്ക് നേരെ മാവോവാദി സംഘം വെടിയുതിർക്കുകയായിരുന്നു. സേന ശക്തമായി തിരിച്ചടിച്ചു. മണിക്കൂറുകൾ നീണ്ട വെടിവെപ്പിന് ശേഷം വനത്തിൽ നടത്തിയ തിരച്ചിലിലാണ് ഗണേഷ് ഉയ്ക്കേ ഉൾപ്പെടെയുള്ളവരുടെ മൃതദേഹങ്ങൾ കണ്ടെത്തിയത്. സംഭവസ്ഥലത്തുനിന്ന് വൻതോതിൽ ആയുധങ്ങളും പിടിച്ചെടുത്തിട്ടുണ്ട്.
മാവോവാദി പ്രസ്ഥാനത്തിലെ ഏറ്റവും പ്രമുഖനായ നേതാക്കളിലൊരാളായിരുന്നു തെലങ്കാന നൽഗോണ്ട സ്വദേശിയായ ഗണേഷ്. ഇയാളെ പിടികൂടുന്നവർക്ക് വിവിധ സംസ്ഥാന സർക്കാരുകൾ ചേർന്ന് 1.1 കോടി രൂപ ഇനാം പ്രഖ്യാപിച്ചിരുന്നു.
മാവോയിസ്റ്റ് സെൻട്രൽ കമ്മിറ്റിയിലെ അവശേഷിക്കുന്ന ചുരുക്കം മുതിർന്ന നേതാക്കളിൽ ഒരാളായിരുന്നു ഇദ്ദേഹം. ഒഡീഷയിലെ മാവോവാദി പ്രവർത്തനങ്ങളുടെ പ്രധാന സൂത്രധാരനായിരുന്നു. കഴിഞ്ഞ 40 വർഷമായി മാവോവാദി പ്രസ്ഥാനത്തിൽ സജീവമായ ഇയാൾ 'ദണ്ഡകാരണ്യ സ്പെഷ്യൽ സോൺ കമ്മിറ്റി'യിൽ നിർണ്ണായക ചുമതലകൾ വഹിച്ചിരുന്നു.