ഹരിയാന: ഹരിയാനയിൽ ഒരു സ്ത്രീയുടെ അഴുകിയ മൃതദേഹം ഭർത്താവിന്റെ വീടിനു മുന്നിലുള്ള കുഴിയിൽ കണ്ടെത്തി. ഫരീദാബാദിൽ വെള്ളിയാഴ്ചയാണ് സംഭവം പുറത്തുവന്നത്. സംഭവത്തിൽ മരിച്ചയാളുടെ ഭർത്താവിന്റെ ബന്ധുക്കളെ പോലീസ് കസ്റ്റഡിയിലെടുത്ത് ചോദ്യം ചെയ്തുവരികയാണ്.
പോലീസ് പറയുന്നതനുസരിച്ച്, യുപിയിൽ നിന്നുള്ള തനു (24) എന്ന യുവതി രണ്ട് വർഷം മുമ്പ് ഫരീദാബാദിലെ റോഷൻ നഗറിൽ നിന്നുള്ള അരുൺ എന്നയാളുമായി വിവാഹിതയായി. ഭർത്താവിനും ഭർതൃവീട്ടുകാർക്കുമൊപ്പം അവർ ഫരീദാബാദിലാണ് താമസിക്കുന്നത്. എന്നാൽ, വിവാഹ ദിവസം മുതൽ തന്നെ തനുവിന്റെ ഭർതൃവീട്ടുകാർ ശാരീരികമായും മാനസികമായും ഉപദ്രവിക്കാൻ തുടങ്ങി. കൂടുതൽ പണവും ആഭരണങ്ങളും കൊണ്ടുവരാൻ ആവശ്യപ്പെട്ടായിരുന്നു പീഡനം.
അതേസമയം, തനുവിന്റെ ഭർതൃവീട്ടുകാർ ആവശ്യപ്പെട്ട കാര്യങ്ങൾ നിറവേറ്റാൻ പരമാവധി ശ്രമിച്ചിരുന്നതായാണ് യുവതിയുടെ സഹോദരി പറയുന്നത്എന്നാൽ പീഡനം വർദ്ധിച്ചു വരികയേയുള്ളൂവെന്ന് അവർ ആരോപിച്ചു. "വിവാഹം കഴിഞ്ഞ് രണ്ട് മാസത്തിന് ശേഷം ഭർതൃവീട്ടുകാർക്ക് ബുദ്ധിമുട്ടുകൾ സഹിക്കാൻ കഴിയാത്തതിനാലാണ് അവൾ ഞങ്ങളോടൊപ്പം താമസിക്കാൻ വന്നത്. ഒരു വർഷത്തോളം അവൾ ഞങ്ങളോടൊപ്പം താമസിച്ചു. അതിനുശേഷം, അവളെ ഭർതൃവീട്ടിലേക്ക് അയച്ചപ്പോൾ, വീണ്ടും പീഡനം ആരംഭിച്ചു. ഞങ്ങളോട് സംസാരിക്കാൻ പോലും അവർ അനുവദിച്ചില്ല. ഫോൺ ഉപയോഗിക്കാൻ പോലും അവർ അനുവദിച്ചില്ല," സഹോദരി പ്രീതി പറഞ്ഞു.
ഏപ്രിൽ 9 ന് പ്രീതി തനുവിനെ വിളിക്കാൻ ശ്രമിച്ചെങ്കിലും കോൾ ലഭിച്ചില്ല. സംശയം തോന്നിയ തനുവിന്റെ കുടുംബം ഉടൻ തന്നെ പോലീസിൽ പരാതി നൽകി. എന്നാൽ, കേസിൽ ഇടപെടാനോ അന്വേഷണം നടത്താനോ പോലീസ് തയ്യാറായില്ലെന്ന് അവർ ആരോപിച്ചു. ഏപ്രിൽ 23 ന് മരുമകളുടെ കുടുംബത്തെ വിളിച്ച് തനു വീട് വിട്ടുപോയതായി അമ്മാവൻ അറിയിച്ചു.
എന്നാൽ വീടിനു മുറ്റത്ത് ഭർതൃ പിതാവ് കുഴി എടുക്കുന്നത് നാട്ടുകാരുടെ ശ്രദ്ധയിൽ പെട്ടതോടെയാണ് കൊലപാതകത്തിന്റെ കഥ പുറത്ത് വന്നത്.എന്തിനാണ് കുഴി കുഴിക്കുന്നതെന്ന് ചോദിച്ചപ്പോൾ, വെള്ളം ഒഴുകിപ്പോകാൻ വേണ്ടി കുഴിയെടുക്കുകയായിരുന്നുവെന്നാണ് അയാൾ നാട്ടുകാരോട് പറഞ്ഞിരുന്നത്. എന്നാൽ പിന്നീട് കുഴി മൂടിയ നിലയിൽ കാണുകയും, തണുവിനെ കാണാനില്ലെന്ന് അറിയുകയും ചെയ്തതോടെയാണ് നാട്ടുകാരിൽ സംശയം ഉയർന്നത്.
ഒരാഴ്ച മുമ്പ് ഇതുസംബന്ധിച്ച വിവരം ലഭിച്ചതായി ഡിസിപി ഉഷ കുണ്ടു മാധ്യമങ്ങളോട് പറഞ്ഞു. പരാതി ലഭിച്ചതിനെ തുടർന്ന് അന്വേഷണം ആരംഭിച്ചതായി അവർ പറഞ്ഞു. "ഒരു ആഴ്ച മുമ്പ് പരാതി ലഭിച്ചയുടനെ പോലീസ് ഉടൻ തന്നെ നടപടി ആരംഭിച്ചു. ഞങ്ങൾ മൃതദേഹം കുഴിയിൽ നിന്ന് പുറത്തെടുത്തു. ഈ കേസിൽ നാല് പേരെ അറസ്റ്റ് ചെയ്തിട്ടുണ്ട്. അന്വേഷണം തുടരുകയാണ്," അവർ പറഞ്ഞു.