ന്യൂഡൽഹി: വടക്കൻ ഇംഗ്ലണ്ടിൽ ഇന്ത്യൻ വംശജ എന്ന് കരുതപ്പെടുന്ന 20 വയസ്സുകാരി അതിക്രൂരമായ ലൈംഗിക പീഡനത്തിന് ഇരയായി. സംഭവവുമായി ബന്ധപ്പെട്ട് പ്രതിയെന്ന് സംശയിക്കുന്നയാളുടെ സിസിടിവി ദൃശ്യങ്ങൾ പുറത്തുവിട്ട വെസ്റ്റ് മിഡ്‌ലാൻഡ് പോലീസ്, പ്രതിയെ കണ്ടെത്താൻ പൊതുജനങ്ങളുടെ സഹായം തേടി.(20-year-old woman, believed to be of Indian origin, brutally sexually assaulted in northern England)
വംശീയവിദ്വേഷത്തെ തുടർന്നുള്ള ലൈംഗിക പീഡനമായാണ് സംഭവത്തെ വെസ്റ്റ് മിഡ്‌ലാൻഡ് പോലീസ് വിശേഷിപ്പിക്കുന്നത്. പ്രതിയെ കണ്ടെത്താൻ സാധ്യമായ എല്ലാ വഴികളും ഉപയോഗിക്കുന്നുണ്ടെന്ന് ഡിറ്റക്റ്റീവ് സൂപ്രണ്ട് റോണൻ ടയർ അറിയിച്ചു.
ശനിയാഴ്ച രാത്രി ഏഴരയോടെയാണ് 20 വയസ്സ് പിന്നിട്ട യുവതി അതിക്രമത്തിന് ഇരയായത്. പ്രതിയെന്ന് സംശയിക്കുന്ന വ്യക്തിയുടെ രൂപം പോലീസ് പുറത്തുവിട്ടു: ഇയാൾ വെളുത്ത വർഗ്ഗക്കാരനാണ്, ഏകദേശം 30 വയസ്സോളം പ്രായമുണ്ട്, മുടി പറ്റെ വെട്ടിയതും ഇരുണ്ട നിറത്തിലുള്ള വസ്ത്രം ധരിച്ചതുമാണ്.
സംഭവം നടന്ന സമയത്ത് ഇതുവഴി കടന്നുപോയ കാറുകളിൽ സ്ഥാപിച്ചിട്ടുള്ള ഡാഷ്‌കാം ദൃശ്യങ്ങൾ പരിശോധിച്ച് ഇത്തരത്തിലുള്ള ആളുടെ ചിത്രം പതിഞ്ഞിട്ടുണ്ടോ എന്ന് ശ്രദ്ധിക്കണമെന്നും പോലീസ് പൊതുജനങ്ങളോട് അഭ്യർത്ഥിച്ചു.
അതിജീവിതയെക്കുറിച്ചുള്ള വിവരങ്ങൾ പോലീസ് ഔദ്യോഗികമായി പങ്കുവെച്ചിട്ടില്ലെങ്കിലും, ഇവർ സിഖ് വനിതയാണ് എന്നാണ് പുറത്തുവരുന്ന വിവരം. അതിജീവിതയ്ക്ക് പ്രതിയെ മുൻപരിചയമില്ലെന്നും പോലീസ് സ്ഥിരീകരിച്ചു. പ്രതിയെക്കുറിച്ച് വിവരം ലഭിക്കുന്നവർ 999 എന്ന നമ്പറിൽ വിളിച്ച് വിവരങ്ങൾ കൈമാറണമെന്നും പോലീസ് ആവശ്യപ്പെട്ടു.