മുംബൈ: രാജ്യത്തെ നടുക്കിയ മുംബൈ ഭീകരാക്രമണത്തിൻ്റെ 17-ാം വാർഷികത്തോടനുബന്ധിച്ച് ഡൽഹിയിലെ ഇന്ത്യാ ഗേറ്റിൽ നാഷണൽ സെക്യൂരിറ്റി ഗാർഡ് അനുസ്മരണ പരിപാടി സംഘടിപ്പിക്കും. രാജ്യത്ത് ഇനി ഇത്തരമൊരു സംഭവം ആവർത്തിക്കരുതെന്ന 'ജാഗ്രത' ജനങ്ങളിൽ ഊട്ടിയുറപ്പിക്കുക എന്നതാണ് പരിപാടിയുടെ പ്രധാന ലക്ഷ്യം.(17th anniversary of Mumbai terror attack, NSG to organize memorial event in Delhi)
ഭീകരരോട് പോരാടി വീരമൃത്യു വരിച്ച ധീരസൈനികരെയും, ജീവൻ നഷ്ടപ്പെട്ട 166 നിരായുധരെയും പരിക്കേറ്റ 300-ലേറെ മനുഷ്യരെയും പരിപാടിയിൽ ആദരിക്കും.'ഇനിയൊരിക്കലും ഇല്ല' എന്ന ആപ്തവാക്യം ഉയർത്തിപ്പിടിച്ചാണ് എൻ.എസ്.ജി. വിഭാഗം അനുസ്മരണ പരിപാടി സംഘടിപ്പിക്കുന്നത്. രാജ്യത്തിനായി ജീവൻ ബലിയർപ്പിച്ച ധീരയോദ്ധാക്കളുടെ ചിത്രങ്ങൾക്ക് മുന്നിൽ മെഴുകുതിരി കത്തിക്കുകയും പുഷ്പാർച്ചന നടത്തുകയും ചെയ്യും.
ചടങ്ങിൽ ഉരുകിത്തീരുന്ന മെഴുക് ഉപയോഗിച്ച് മറ്റൊരു സ്മാരകം ധീരയോദ്ധാക്കൾക്കായി നിർമ്മിക്കുമെന്നും എൻ.എസ്.ജി. അറിയിച്ചിട്ടുണ്ട്. ഡൽഹിയിലെ 11 കോളേജുകളിലെയും 26 സ്കൂളുകളിലെയും വിദ്യാർത്ഥികൾ പരിപാടിയിൽ പങ്കെടുക്കും. സമാധാനം, ജാഗ്രത, ദേശസുരക്ഷ എന്നിവയിൽ യുവാക്കളുടെ പ്രതിബദ്ധത ഉയർത്തുകയെന്ന ലക്ഷ്യത്തോടെ പരിപാടിയിൽ പ്രതിജ്ഞ ചൊല്ലും. മരിച്ചവർക്കും അതിജീവിച്ചവർക്കും വേണ്ടി പരിപാടിയിൽ പങ്കെടുക്കുന്നവർക്ക് സന്ദേശമെഴുതാനുള്ള സൗകര്യവും ഇവിടെ ഒരുക്കും.
2008 നവംബർ 26-നാണ് രാജ്യത്തെ നടുക്കിയ വലിയ ഭീകരാക്രമണം നടന്നത്. പാകിസ്ഥാനിൽ നിന്ന് കടൽ മാർഗം എത്തിയ പത്തോളം ഭീകരർ നഗരത്തിൽ പലയിടങ്ങളിലായി ഒരേ സമയം ആക്രമണം അഴിച്ചുവിടുകയായിരുന്നു. സുരക്ഷാ ഉദ്യോഗസ്ഥരും വിദേശികളും അടക്കം 166 പേരാണ് ഈ ആക്രമണത്തിൽ കൊല്ലപ്പെട്ടത്.