പത്താൻകോട്ട് : ഇന്ത്യയിലെ സുപ്രധാനമായ രഹസ്യവിവരങ്ങൾ പാക്കിസ്ഥാന് ചോർത്തി നൽകിയ സംഭവത്തിൽ 15 വയസ്സുള്ള ആൺകുട്ടിയെ പഞ്ചാബ് പോലീസ് അറസ്റ്റ് ചെയ്തു. പത്താൻകോട്ട് അതിർത്തി മേഖലകളിൽ നിന്നും സൈനിക നീക്കങ്ങളും മറ്റ് രഹസ്യവിവരങ്ങളും ഐഎസ്ഐയ്ക്ക് കൈമാറിയെന്നാണ് കണ്ടെത്തൽ.(15-year-old arrested in Punjab for leaking sensitive information to Pakistan for almost a year)
കഴിഞ്ഞ ഒരു വർഷമായി കുട്ടി പാക്കിസ്ഥാൻ ഏജന്റുമാരുമായി നിരന്തരം ബന്ധപ്പെട്ടിരുന്നതായി അന്വേഷണത്തിൽ വ്യക്തമായി. ജമ്മുവിലെ സാംബ ജില്ലയിൽ താമസിക്കുന്ന കുട്ടി തന്റെ മൊബൈൽ ഫോൺ ഉപയോഗിച്ചാണ് ചിത്രങ്ങളും ലൊക്കേഷൻ വിവരങ്ങളും അയച്ചു നൽകിയിരുന്നത്.
തനിക്കൊപ്പം മറ്റ് ചിലരും ഇത്തരത്തിൽ വിവരങ്ങൾ കൈമാറുന്നുണ്ടെന്ന് കുട്ടി പോലീസിനോട് വെളിപ്പെടുത്തിയിട്ടുണ്ട്. ഇതോടെ പ്രായപൂർത്തിയാകാത്ത കൂടുതൽ കുട്ടികളെ ഐഎസ്ഐ തങ്ങളുടെ ചാരശൃംഖലയിൽ ഉൾപ്പെടുത്തിയിട്ടുണ്ടോ എന്ന് പോലീസ് സംശയിക്കുന്നു.
പത്താൻകോട് പോലീസ് സൂപ്രണ്ട് ദൽജീന്ദർ സിങ് ദിലന്റെ നേതൃത്വത്തിലുള്ള സംഘമാണ് കേസ് അന്വേഷിക്കുന്നത്. സമൂഹമാധ്യമങ്ങൾ വഴി കുട്ടികളെ കെണിയിൽ പെടുത്തുന്ന രീതി പാക്കിസ്ഥാൻ ഏജൻസികൾ പിന്തുടരുന്നുണ്ടോ എന്നും നിരീക്ഷിക്കുന്നുണ്ട്.