ന്യൂഡൽഹി: ഡൽഹി ചെങ്കോട്ട സ്ഫോടനക്കേസിലെ മുഖ്യപ്രതികളിൽ ഒരാളും ജെയ്‌ഷെ മുഹമ്മദിന്റെ വനിതാ വിഭാഗം നേതാവുമായി തിരിച്ചറിഞ്ഞ ഡോ. ഷഹീൻ സയീദിൻ്റെ വിചിത്രമായ പെരുമാറ്റത്തെക്കുറിച്ച് സഹപ്രവർത്തകർ. ഫരീദാബാദിലെ അൽ-ഫലാഹ് സ്കൂൾ ഓഫ് മെഡിക്കൽ സയൻസസിലെ തൻ്റെ പകൽ ജോലി സമയം അവസാനിച്ച ശേഷം വൈകുന്നേരം 4 മണിക്ക് ശേഷമാണ് യഥാർത്ഥ ജോലി തുടങ്ങുക എന്ന് ഇവർ സഹപ്രവർത്തകരോട് പറയാറുണ്ടായിരുന്നതായി റിപ്പോർട്ട് ചെയ്യുന്നു.(10 people, including government employees, arrested in Jammu and Kashmir in connection with Delhi blast case)
ഷഹീൻ എന്നും ഒരു ജപമാലയും ഒരു ഹദീസ് ഗ്രന്ഥവും കൈവശം വെച്ചിരുന്നതായി അന്വേഷണ ഉദ്യോഗസ്ഥർ പറയുന്നു. സ്ഥാപനത്തിലെ നിയമങ്ങൾ പാലിക്കാതെ പലപ്പോഴും ആരെയും അറിയിക്കാതെ ഷഹീൻ പോകുമായിരുന്നുവെന്നും, അവരുടെ പെരുമാറ്റം വിചിത്രമായിരുന്നുവെന്നും പേര് ഒരു സഹപ്രവർത്തകൻ വ്യക്തമാക്കി.
ലഖ്‌നൗ സ്വദേശിനിയായ ഷഹീൻ മുമ്പ് കാൻപൂർ മെഡിക്കൽ കോളേജിലെ ഫാർമക്കോളജി വിഭാഗം മേധാവിയായി പ്രവർത്തിച്ചിരുന്നു. പിന്നീട് കനൗജ് മെഡിക്കൽ കോളേജിലേക്ക് സ്ഥലം മാറിയെന്നും ഇൻ്റലിജൻസ് സൂചിപ്പിക്കുന്നു. തങ്ങളുടെ സ്ഥാപനത്തിന് റെഡ് ഫോർട്ട് ആക്രമണവുമായി ബന്ധമില്ലെന്നും അന്വേഷണവുമായി സഹകരിക്കുമെന്നും അൽ-ഫലാഹ് സ്കൂൾ ഓഫ് മെഡിക്കൽ സയൻസസ് അറിയിച്ചു.
2001-ലെ പാർലമെൻ്റ് ആക്രമണത്തിനും 2019-ലെ പുൽവാമ ആക്രമണത്തിനും പിന്നിൽ പ്രവർത്തിച്ച പാകിസ്ഥാൻ ആസ്ഥാനമായുള്ള ജെയ്‌ഷെ മുഹമ്മദ് ഭീകര സംഘടനയാണ് ഈ ശൃംഖലക്ക് പിന്നിലെന്നാണ് ഇൻ്റലിജൻസ് നിഗമനം. ഷഹീൻ സയീദിനെ വനിതാ വിഭാഗം തലവനായാണ് തിരിച്ചറിഞ്ഞത്. ചെങ്കോട്ട സ്ഫോടനത്തിന് മണിക്കൂറുകൾക്ക് മുമ്പ് തിങ്കളാഴ്ചയാണ് ഷഹീൻ അറസ്റ്റിലായത്. അറസ്റ്റിലായ ഡോ. മുജമ്മിൽ ഷക്കീൽ, ഡോ. ആദിൽ അഹമ്മദ് റാഥർ എന്നിവരും കൊല്ലപ്പെട്ട ഉമർ മുഹമ്മദും ഉൾപ്പെടെയുള്ള സംഘം വിദ്യാസമ്പന്നരായ പ്രൊഫഷണലുകൾ ആണെന്നത് അന്വേഷണത്തിൽ കണ്ടെത്തി.
ഭീകരസംഘത്തിലെ നാലാമത്തെ അംഗമായ ഉമർ മുഹമ്മദ് പരിഭ്രാന്തനായി ഐ20 കാർ ഓടിക്കുകയും അത് ചെങ്കോട്ടയ്ക്ക് സമീപം പൊട്ടിത്തെറിക്കുകയും ആയിരുന്നു. ഡൽഹി-എൻ.സി.ആർ. പ്രദേശങ്ങളിലും രാജ്യത്തിൻ്റെ മറ്റ് ഭാഗങ്ങളിലും സ്ഫോടന പരമ്പരകൾക്ക് ഭീകരർക്ക് പദ്ധതിയുണ്ടായിരുന്നുവെന്ന് അന്വേഷണ വൃത്തങ്ങൾ സൂചിപ്പിക്കുന്നു.
ഷക്കീലിൻ്റെ വീട്ടിൽ നിന്നാണ് ഏകദേശം 3,000 കിലോഗ്രാം സ്ഫോടകവസ്തുക്കൾ കണ്ടെടുത്തത്. ഡൽഹി ചെങ്കോട്ട സ്ഫോടനക്കേസുമായി ബന്ധപ്പെട്ട് ജമ്മു കശ്മീരിൽ 10 പേരെ സുരക്ഷാ ഏജൻസികൾ കസ്റ്റഡിയിലെടുത്തു. കശ്മീരിലെ പുൽവാമ, കുൽഗാം, അനന്തനാഗ് ജില്ലകളിൽ നിന്നാണ് ഇവരെ കസ്റ്റഡിയിലെടുത്തിരിക്കുന്നത്. കസ്റ്റഡിയിലായവരിൽ സർക്കാർ ജീവനക്കാരും ഉൾപ്പെട്ടിട്ടുണ്ടെന്നാണ് വിവരം. കേസിലെ അന്വേഷണം നീങ്ങുന്നത് പാകിസ്ഥാനിലേക്കാണെന്ന് റിപ്പോർട്ടുകൾ സൂചിപ്പിക്കുന്നു.
ചെങ്കോട്ട സ്ഫോടനക്കേസുമായി ബന്ധപ്പെട്ട് നേരത്തെ അറസ്റ്റിലായ ലക്‌നൗ സ്വദേശി ഡോക്ടർ ഷഹീൻ ജെയ്‌ഷെ മുഹമ്മദ് തലവൻ മസൂദ് അസറിന്റെ അനന്തരവന്റെ ഭാര്യ ആരിഫ ബീവിയുമായി അടുത്ത ബന്ധം പുലർത്തിയിരുന്നു എന്ന് അന്വേഷണ ഏജൻസികൾ കണ്ടെത്തി. ആരിഫ ബീവിയുമായി ഡോക്ടർ ഷഹീൻ നിരന്തരം സമ്പർക്കത്തിലായിരുന്നു എന്ന് ഏജൻസികൾ വ്യക്തമാക്കുന്നു. നേരത്തെ ജെയ്‌ഷെ മുഹമ്മദിന്റെ വനിതാ സംഘത്തിനായി ഷഹീൻ പ്രവർത്തിച്ചിരുന്നു എന്ന വിവരം പുറത്തുവന്നിരുന്നു.
എന്നാൽ, നിലവിലെ റിപ്പോർട്ടുകൾ പ്രകാരം ജെയ്‌ഷെ മുഹമ്മദിലെ ഉന്നതരുമായി ഷഹീന് നേരിട്ട് ബന്ധമുണ്ടെന്നാണ് സൂചന. മസൂദ് അസറിന്റെ കുടുംബാംഗം വഴിയാണ് ഈ ബന്ധം സ്ഥാപിക്കപ്പെട്ടതെന്നാണ് അനുമാനം. ചെങ്കോട്ട സ്ഫോടനത്തിന്റെ ഗൂഢാലോചനയിലും നെറ്റ്‌വർക്കിലും പാകിസ്ഥാൻ കേന്ദ്രീകരിച്ചുള്ള ഭീകരസംഘടനകൾക്ക് പങ്കുണ്ടെന്ന സംശയങ്ങൾ ബലപ്പെടുത്തുന്നതാണ് പുതിയ കണ്ടെത്തലുകൾ.