കോഴിക്കോട്: സംസ്ഥാനത്ത് തദ്ദേശ തിരഞ്ഞെടുപ്പിൻ്റെ രണ്ടാംഘട്ട പോളിങ് ആരംഭിച്ചു. തൃശൂർ, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസർഗോഡ് എന്നീ വടക്കൻ കേരളത്തിലെ ഏഴ് ജില്ലകളിലായി 604 തദ്ദേശ സ്ഥാപനങ്ങളിലേക്കാണ് ഇന്ന് വോട്ടെടുപ്പ് നടക്കുന്നത്. ആദ്യ രണ്ട് മണിക്കൂർ പിന്നിട്ടപ്പോൾ 8.82 ശതമാനം പോളിങ് രേഖപ്പെടുത്തി.(Voting in progress in northern districts of Kerala )
രാവിലെ 9 മണി വരെയുള്ള കണക്കുകൾ അനുസരിച്ച്, വയനാട് (9.91%), പാലക്കാട് (9.18%), തൃശൂർ (8.94%) എന്നീ ജില്ലകളാണ് പോളിങ് ശതമാനത്തിൽ മുന്നിട്ടുനിൽക്കുന്നത്. മറ്റ് ജില്ലകളായ മലപ്പുറം, കോഴിക്കോട്, കണ്ണൂർ, കാസർഗോഡ് എന്നിവിടങ്ങളിലും പോളിങ് എട്ട് ശതമാനത്തിന് മുകളിലാണ്. വോട്ടെടുപ്പിൻ്റെ ആദ്യ മണിക്കൂറുകളിൽ തന്നെ പലയിടത്തും ബൂത്തുകളിൽ വോട്ടർമാരുടെ നീണ്ട നിര ദൃശ്യമായിരുന്നു.
പോളിങ്ങിന്റെ ആദ്യ മണിക്കൂറുകളിൽ നൂറിലേറെ ബൂത്തുകളിൽ വോട്ടിങ് യന്ത്രങ്ങൾ തകരാറിലായത് പോളിങ്ങിനെ കാര്യമായി ബാധിച്ചു. പ്രശ്നം പരിഹരിച്ചതിനെ തുടർന്ന് മിക്കയിടത്തും വോട്ടെടുപ്പ് പുനഃസ്ഥാപിച്ചെങ്കിലും ചിലയിടങ്ങളിൽ വോട്ടർമാർക്ക് ഏറെ നേരം കാത്തുനിൽക്കേണ്ടി വന്നു.
പാലക്കാട് നെല്ലായ പട്ടിശ്ശേരി വാർഡിലെ ബൂത്ത് ഒന്നിൽ അര മണിക്കൂറും വാണിയംകുളം മനിശ്ശേരി വെസ്റ്റ് ആറാം വാർഡിലെ കുന്നുംപുറം ബൂത്തിൽ 15 മിനിറ്റോളവും വോട്ടിങ് തടസ്സപ്പെട്ടു. മലപ്പുറം, കോഴിക്കോട്, കാസർകോട് ജില്ലകളിലും നിരവധി ബൂത്തുകളിൽ യന്ത്രത്തകരാർ റിപ്പോർട്ട് ചെയ്തു. മലപ്പുറം എ.ആർ. നഗർ, കോഴിക്കോട് കൊടിയത്തൂർ, വടകര ചോറോട്, കിഴക്കോത്ത് പഞ്ചായത്തുകളിലെ ബൂത്തുകളിലും കാസർകോട് ദേലംപാടി പഞ്ചായത്തിലെ പള്ളംകോട് ബൂത്തിലും വോട്ടിങ് മെഷീൻ തകരാറിലായതിനെ തുടർന്ന് വോട്ടെടുപ്പ് വൈകി. വടകര ചോറോട് പഞ്ചായത്തിലെ ഒരു ബൂത്തിൽ മോക്ക് പോളിങ് പോലും നടത്താൻ സാധിച്ചിരുന്നില്ല.
തകരാറിലായ എല്ലാ ബൂത്തുകളിലും പുതിയ വോട്ടിങ് മെഷീനുകൾ എത്തിച്ച് വോട്ടെടുപ്പ് പുനഃസ്ഥാപിക്കാനുള്ള ശ്രമങ്ങൾ തുടരുകയാണ്. പോളിങ് വൈകിട്ട് 6 മണി വരെ തുടരും. വോട്ടിങ് സമയം അവസാനിക്കുമ്പോൾ ക്യൂവിലുള്ള എല്ലാ വോട്ടർമാർക്കും വോട്ട് രേഖപ്പെടുത്താൻ അവസരം നൽകും. കഴിഞ്ഞ ദിവസം വോട്ടിങ് യന്ത്രം തകരാറിലായ ആലപ്പുഴ മണ്ണഞ്ചേരി ഗവ. ഹൈസ്കൂൾ ബൂത്തിലെ റീപോളിങ്ങും ഇന്ന് നടക്കുന്നുണ്ട്. എല്ലായിടത്തും വോട്ടെണ്ണൽ മറ്റന്നാൾ നടക്കും.
വോട്ട് രേഖപ്പെടുത്തിയ ശേഷം മുഖ്യമന്ത്രി പിണറായി വിജയൻ മാധ്യമങ്ങളോട് സംസാരിച്ചു. എൽഡിഎഫ് നല്ല ആത്മവിശ്വാസത്തിലാണെന്ന് മുഖ്യമന്ത്രി വ്യക്തമാക്കി. "എൽഡിഎഫിന് ചരിത്ര വിജയം സമ്മാനിക്കുമെന്നാണ് പ്രതീക്ഷ," അദ്ദേഹം പറഞ്ഞു. ശബരിമല വിഷയം ഈ തിരഞ്ഞെടുപ്പിനെ ബാധിക്കില്ലെന്നും അദ്ദേഹം കൂട്ടിച്ചേർത്തു.
വോട്ടെടുപ്പ് പുരോഗമിക്കുന്നതിനിടെ വിവിധ ഇടങ്ങളിൽ നിന്ന് സംഘർഷ റിപ്പോർട്ടുകളും വരുന്നുണ്ട്. പരിയാരം പഞ്ചായത്തിലെ 16-ാം വാർഡിലെ 2-ാം ബൂത്തിൽ യുഡിഎഫ് സ്ഥാനാർത്ഥിയെയും ബൂത്ത് ഏജൻ്റുമാരെയും സിപിഎം പ്രവർത്തകർ കയ്യേറ്റം ചെയ്തതായി പരാതി ഉയർന്നു. യുഡിഎഫ് സ്ഥാനാർത്ഥി പി.വി. സജീവനെയും ബൂത്ത് ഏജൻ്റുമാരെയുമാണ് ഇന്ന് രാവിലെ പരിയാരം ഗവ: ഹൈസ്കൂൾ ബൂത്തിൽ വെച്ച് ആക്രമിച്ചത്.
ഓപ്പൺ വോട്ട് ചെയ്യുന്നതുമായി ബന്ധപ്പെട്ട തർക്കമാണ് സംഘർഷത്തിലും കയ്യേറ്റത്തിലും കലാശിച്ചത്. സംഭവത്തിൽ പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്.
തദ്ദേശ തിരഞ്ഞെടുപ്പിനോടനുബന്ധിച്ച് പാലക്കാട് ജില്ലയിൽ സംഘർഷങ്ങളും തിരഞ്ഞെടുപ്പ് ചട്ടലംഘന ആരോപണങ്ങളും ശക്തമാകുന്നു. കെഎസ്യു പ്രവർത്തകനെ മർദിച്ച സംഭവത്തിൽ ബിജെപി സ്ഥാനാർത്ഥിക്കായി പോലീസ് തിരച്ചിൽ ആരംഭിച്ചു. ഇതിനിടെ, വോട്ടർമാരെ സ്വാധീനിക്കാൻ പൂജിച്ച താമര വിതരണം ചെയ്തെന്ന ഗുരുതരമായ പരാതിയും കോൺഗ്രസ് തിരഞ്ഞെടുപ്പ് കമ്മീഷന് നൽകി.
ബിജെപി സ്ഥാനാർത്ഥിക്കായി തിരച്ചിൽ. പാലക്കാട് കല്ലേക്കാട് കെഎസ്യു പ്രവർത്തകനെ മർദിച്ച സംഭവവുമായി ബന്ധപ്പെട്ടാണ് പോലീസ് നടപടി. അക്രമത്തിൽ പങ്കെടുത്തവരിൽ പിരായിരി പഞ്ചായത്തിലെ 18-ാം വാർഡിലെ ബിജെപി സ്ഥാനാർത്ഥി അരുൺ ആലങ്ങാടും ഉൾപ്പെടുന്നു എന്ന് പരാതി ലഭിച്ചു. പരാതിയുടെ അടിസ്ഥാനത്തിൽ അരുൺ ആലങ്ങാടിനെ പിടികൂടാനായി പോലീസ് തിരച്ചിൽ ഊർജിതമാക്കി.
തിരഞ്ഞെടുപ്പ് ദിവസത്തിന് തൊട്ടുമുമ്പ് കല്ലേക്കാട് ഡിസിസി സെക്രട്ടറിയുടെ വീടിന് നേരെ ആക്രമണമുണ്ടായ സംഭവത്തിലും ബിജെപി പ്രവർത്തകരാണ് പ്രതികളെന്ന് കോൺഗ്രസ് ആരോപിച്ചിരുന്നു. വോട്ടെടുപ്പ് ദിവസം തന്നെ വോട്ടർമാരെ സ്വാധീനിക്കാൻ ശ്രമം നടന്നുവെന്ന് കാട്ടിയാണ് കോൺഗ്രസ് തിരഞ്ഞെടുപ്പ് കമ്മീഷനെ സമീപിച്ചിരിക്കുന്നത്.
പാലക്കാട് നഗരസഭ 19-ാം വാർഡ് കൊപ്പത്ത് വോട്ടർമാർക്ക് വിതരണം ചെയ്യുന്നതിനായി ബിജെപി പ്രവർത്തകർ പൂജിച്ച താമരപ്പൂക്കൾ ഉപയോഗിച്ചു. ഇത് വോട്ടർമാരെ സ്വാധീനിക്കാനുള്ള ശ്രമമാണെന്നും ചട്ടലംഘനമാണെന്നും കോൺഗ്രസ് ആരോപിച്ചു. കോൺഗ്രസ് നൽകിയ പരാതിയുടെ അടിസ്ഥാനത്തിൽ തിരഞ്ഞെടുപ്പ് കമ്മീഷൻ സംഭവം പരിശോധിക്കാൻ നിർദേശം നൽകി.