തിരുവനന്തപുരം: തദ്ദേശ തെരഞ്ഞെടുപ്പിലെ ഏറ്റവും ശ്രദ്ധേയമായ ഫലങ്ങളിലൊന്ന് പുറത്തുവന്ന തിരുവനന്തപുരം കോർപ്പറേഷനിലെ മുട്ടട വാർഡിൽ യുഡിഎഫ് ചരിത്ര വിജയം നേടി. ഇടതുമുന്നണിയുടെ ശക്തമായ സിറ്റിങ് സീറ്റായ ഇവിടെ 25 വർഷങ്ങൾക്ക് ശേഷമാണ് യുഡിഎഫ് സ്ഥാനാർത്ഥി വിജയിക്കുന്നത്.(Vaishna Suresh wins, UDF to an absolute majority in Thrissur in Local body elections)
യുഡിഎഫ് സ്ഥാനാർത്ഥിയായ വൈഷ്ണ സുരേഷ് ആണ് അട്ടിമറി വിജയം നേടി എൽഡിഎഫിന്റെ കോട്ട പിടിച്ചെടുത്തത്.
വിജയി: വൈഷ്ണ സുരേഷ് (യുഡിഎഫ്) – 363 വോട്ടുകൾ
എൽഡിഎഫ് സ്ഥാനാർത്ഥി: അംശു വാമദേവൻ – 231 വോട്ടുകൾ
ബിജെപി സ്ഥാനാർത്ഥി: അജിത് കുമാർ – 106 വോട്ടുകൾ
വിജയത്തിന് ശേഷം വൈഷ്ണ സുരേഷ് മാധ്യമങ്ങളോട് പ്രതികരിച്ചു. "ഇത് ജനാധിപത്യത്തിന്റെ വിജയമാണ്, ജനങ്ങൾ നൽകിയ വിജയമാണ്. വോട്ടർ പട്ടികയിലെ പേരുമായി ബന്ധപ്പെട്ട പ്രശ്നത്തിനിടെ ഞാൻ പറഞ്ഞിരുന്നത് സത്യം വിജയിക്കുമെന്നാണ്. ഇന്നും അത് തന്നെയാണ് പറയാനുള്ളത്. കഠിനാധ്വാനവും എന്റെ പ്രയത്നവും ജനങ്ങൾ തിരിച്ചറിഞ്ഞ് വലിയ പിന്തുണ നൽകി. വളരെയധികം സന്തോഷമുണ്ട്, ജനങ്ങളോട് നന്ദിയുണ്ട്."
ഇടത് കോട്ട പിടിച്ചെടുത്ത ഈ വിജയം തിരുവനന്തപുരം കോർപ്പറേഷനിലെ യുഡിഎഫ് ക്യാമ്പിന് വലിയ ആത്മവിശ്വാസമാണ് നൽകിയിരിക്കുന്നത്. തൃശൂർ കോർപ്പറേഷനിലെ വോട്ടെണ്ണലിൽ യുഡിഎഫ് കേവല ഭൂരിപക്ഷത്തിലേക്ക് അടുക്കുന്നതായി സൂചന. ഏറ്റവും പുതിയ ലീഡ് നില അനുസരിച്ച് യുഡിഎഫ് വലിയ മുന്നേറ്റമാണ് കോർപ്പറേഷനിൽ നടത്തിയിരിക്കുന്നത്.
തുടക്കത്തിലെ ലീഡ് നില മാറിമറിഞ്ഞതിന് ശേഷം യുഡിഎഫ് ലീഡ് നിലയിൽ വലിയ വർദ്ധനവുണ്ടാക്കി. നിലവിൽ എൽഡിഎഫിനേക്കാൾ ഇരട്ടിയോളം സീറ്റുകളിൽ യുഡിഎഫാണ് മുന്നിട്ട് നിൽക്കുന്നത്. യുഡിഎഫ് കേവല ഭൂരിപക്ഷത്തിലേക്ക് അടുക്കുന്നു. എൽഡിഎഫ് ലീഡ് നിലയിൽ പിറകിലായി.
ആദ്യ ഘട്ടത്തിൽ മികച്ച മുന്നേറ്റം കാഴ്ചവെച്ച എൻഡിഎയ്ക്ക് പിന്നീട് ക്ഷീണം സംഭവിച്ചു. തൃശൂർ കോർപ്പറേഷനിൽ ഭരണം പിടിക്കാനുള്ള യുഡിഎഫിന്റെ ശ്രമങ്ങൾക്ക് ഈ മുന്നേറ്റം വലിയ പ്രതീക്ഷ നൽകുന്നുണ്ട്. ബാക്കിയുള്ള വാർഡുകളിലെ ഫലത്തിനായി കാത്തിരിക്കുകയാണ് മുന്നണികൾ.
തദ്ദേശ സ്വയംഭരണ സ്ഥാപനങ്ങളിലേക്കുള്ള വോട്ടെണ്ണലിൽ ഷൊർണൂർ നഗരസഭയിൽ എൽഡിഎഫ് ഭരണം നിലനിർത്തി. അതേസമയം, പാലക്കാട് നഗരസഭയിൽ ശക്തമായ അടിയൊഴുക്കിൽ ബിജെപിക്ക് സിറ്റിങ് സീറ്റുകൾ നഷ്ടമായി. 35 വാർഡുകളിലെ വോട്ടെണ്ണൽ പൂർത്തിയായപ്പോൾ എൽഡിഎഫ് ഭരണം ഉറപ്പിച്ചു.
എൽഡിഎഫ് 17 വാർഡുകളിൽ വിജയം നേടി ഭരണം നിലനിർത്തി. ബി ജെ പി 12 വാർഡുകളിൽ വിജയിച്ചുകൊണ്ട് സീറ്റ് വർദ്ധിപ്പിച്ചു. കോൺഗ്രസ് 4 സീറ്റുകളിലേക്ക് ഒതുങ്ങി. എൽഡിഎഫിനെതിരെ കോൺഗ്രസ് പിന്തുണയോടെ മത്സരിച്ച മുൻ നഗരസഭ സ്ഥിരം സമിതി അധ്യക്ഷ വി. നിർമ്മല വിജയിച്ചു.
തുടക്കത്തിൽ വലിയ വെല്ലുവിളി ഉയർത്തിയെങ്കിലും പാലക്കാട് നഗരസഭയിൽ ബിജെപിക്ക് ക്ഷീണം. 35 വാർഡുകളിലെ ഫലം പൂർത്തിയായപ്പോൾ ബിജെപിക്ക് നാല് സിറ്റിങ് സീറ്റുകൾ നഷ്ടമായി.
എൽഡിഎഫ്: 17 വാർഡുകളിൽ വിജയം.
ബിജെപി: 12 വാർഡുകളിൽ വിജയം.
കോൺഗ്രസ്: 4 സീറ്റുകളിൽ വിജയം.
ശക്തമായ അടിയൊഴുക്കാണ് ബിജെപിയുടെ സിറ്റിങ് സീറ്റുകൾ നഷ്ടപ്പെടാൻ കാരണമായതെന്നാണ് വിലയിരുത്തൽ.
മണക്കാട് പഞ്ചായത്തിലെ ഒന്നാം വാർഡിൽ വിജയിച്ചുകൊണ്ട് ട്വന്റി 20 ഇടുക്കി ജില്ലയിൽ അക്കൗണ്ട് തുറന്നു. ജെസ്സി ജോണിയാണ് ഇവിടെ വിജയിച്ചത്. കിഴക്കമ്പലം പഞ്ചായത്തിലെ ആദ്യ ഫലങ്ങൾ പുറത്തുവരുമ്പോൾ ട്വന്റി 20 കിതച്ചു. മൂന്നിടത്ത് യുഡിഎഫ് പിന്തുണയോടെ മത്സരിച്ച സ്ഥാനാർത്ഥികൾ വിജയിച്ചു.
വാർഡ് 1: സബിത അലിയാർ (മഹിളാ കോൺഗ്രസ് മണ്ഡലം പ്രസിഡന്റ്)
വാർഡ് 2: ഹേബി സുഗതൻ (സ്വതന്ത്ര)
വാർഡ് 3: മെയ് മോൾ (സ്വതന്ത്ര)