തൃശൂർ: തദ്ദേശ തെരഞ്ഞെടുപ്പിൽ തൃശൂർ കോർപ്പറേഷൻ പിടിച്ചെടുക്കാൻ മുന്നണികൾ ശക്തമായ നീക്കങ്ങൾ ആരംഭിച്ചു. മേയർ സ്ഥാനത്തേക്ക് മൂന്ന് വനിതാ നേതാക്കളെ പരിഗണിച്ചുകൊണ്ട് കോൺഗ്രസ് തങ്ങളുടെ സ്ഥാനാർത്ഥി പട്ടികയിലെ പ്രധാന മുഖങ്ങളെ തീരുമാനിച്ചു.(Thrissur Corporation elections, Congress considering 3 women leaders for the post of mayor)
തൃശൂർ കോർപ്പറേഷനിൽ മേയർ സ്ഥാനത്തേക്ക് കോൺഗ്രസ് പരിഗണിക്കുന്ന മൂന്ന് പ്രമുഖർ ലാലി ജയിംസ്, നിജി ജസ്റ്റിൻ, സുബി ബാബു എന്നിവരാണ്. ഇവർ മത്സരിക്കേണ്ട വാർഡുകളിൽ ഏകദേശ ധാരണയായിട്ടുണ്ട്. ലാലി ജയിംസ് ലാലൂരിലും, നിജി ജസ്റ്റിൻ കിഴക്കുമ്പാട്ടുകരയിലും, സുബി ബാബു ഗാന്ധിനഗറിലും മത്സരിച്ചേക്കും. എന്നാൽ, കിഴക്കുമ്പാട്ടുകരയിൽ പ്രാദേശിക വാദം ശക്തമായാൽ നിജി ജസ്റ്റിന് മറ്റൊരു ഡിവിഷൻ നൽകാനും സാധ്യതയുണ്ട്.
കോൺഗ്രസ് പട്ടികയിൽ രണ്ട് കെ.പി.സി.സി. സെക്രട്ടറിമാരുമുണ്ട്. ജോൺ ഡാനിയൽ – പാട്ടുരായ്ക്കൽ, എ. പ്രസാദ് – സിവിൽ സ്റ്റേഷൻ എന്നിങ്ങനെയാണ്. കൂടാതെ, ജനറൽ സീറ്റുകളിൽ രണ്ട് വനിതകളെ കൂടി കോൺഗ്രസ് പരിഗണിച്ചേക്കും. പുതൂർക്കരയിൽ മെഫി ഡെൽസണും, ചേറൂരിൽ അഡ്വ. വില്ലി ജിജോയും മത്സരിച്ചേക്കും. യൂത്ത് കോൺഗ്രസ് സംസ്ഥാന ജനറൽ സെക്രട്ടറി മിഥുൻ മോഹൻ പൂത്തോളിൽ മത്സരിച്ചേക്കും എന്നാണ് ധാരണ.
രണ്ട് തവണ മത്സരിച്ചവർക്ക് സീറ്റ് നൽകേണ്ട എന്ന കർശന നിലപാടിലാണ് സി.പി.എം. കോർപ്പറേഷനിലെ പത്ത് വാർഡുകളിൽ ക്രിസ്ത്യൻ സ്ഥാനാർത്ഥികളെ പരിഗണിക്കാനാണ് ബി.ജെ.പി.യുടെ നീക്കം. തൃശൂർ കോർപ്പറേഷൻ തെരഞ്ഞെടുപ്പിലെ സ്ഥാനാർത്ഥി ചിത്രങ്ങൾ തെളിഞ്ഞതോടെ, വരും ദിവസങ്ങളിൽ മുന്നണികൾ തമ്മിലുള്ള അങ്കം കൂടുതൽ ശക്തമാകും.