തിരുവനന്തപുരം: തദ്ദേശ സ്വയംഭരണ സ്ഥാപനങ്ങളിലേക്കുള്ള തിരഞ്ഞെടുപ്പ് ചിത്രം വ്യക്തമായതോടെ വിമത ഭീഷണി നേരിടുന്ന യു.ഡി.എഫ്. പാർട്ടികൾ കർശന അച്ചടക്ക നടപടികളിലേക്ക് കടന്നു. എറണാകുളത്ത് മുസ്ലിം ലീഗിലും വിവിധ ജില്ലകളിൽ കോൺഗ്രസിലുമായി നിരവധി നേതാക്കളെയും സ്ഥാനാർഥികളെയും സസ്പെൻഡ് ചെയ്തു.(Strict action to prevent rebel movement, Muslim League state leader suspended in Kalamassery)
കളമശ്ശേരിയിൽ സംസ്ഥാന നേതാവിനെ സസ്പെൻഡ് ചെയ്തു കളമശ്ശേരി നഗരസഭയിലാണ് മുസ്ലിം ലീഗ് കടുത്ത നടപടി സ്വീകരിച്ചത്. വിമത സ്ഥാനാർഥിക്കായി പ്രചാരണം നടത്തിയ സംസ്ഥാന പ്രവർത്തക സമിതി അംഗം എൻ.കെ. നാസറിനെയാണ് പാർട്ടി സസ്പെൻഡ് ചെയ്തത്. കൂടാതെ, കളമശ്ശേരി നഗരസഭയിലെ വിമത സ്ഥാനാർഥി പി.എ. അനസിനെയും സസ്പെൻഡ് ചെയ്തിട്ടുണ്ട്. ജില്ലയിൽ വിമത നീക്കത്തിന്റെ പേരിൽ ഇതുവരെ 10 പേർക്കെതിരെയാണ് ലീഗ് നടപടിയെടുത്തത്.
വിമത ഭീഷണി ഏറ്റവും രൂക്ഷമായ കോൺഗ്രസ് വിവിധ ജില്ലകളിൽ നിരവധി പേരെയാണ് പുറത്താക്കിയത്. യു.ഡി.എഫ്. മേയർ സ്ഥാനാർഥിയായി പരിഗണിക്കുന്ന പി. ഇന്ദിരയ്‌ക്കെതിരെ പയ്യാമ്പലത്ത് മത്സരിക്കുന്ന മഹിളാ കോൺഗ്രസ് നേതാവ് കെ.എൻ. ബിന്ദുവിനെയും അവരുടെ ഭർത്താവും ബൂത്ത് പ്രസിഡന്റുമായ രഘൂത്തമനെയും കോൺഗ്രസ് പുറത്താക്കി. കെ. സുധാകരൻ എം.പി. അടക്കം ആവശ്യപ്പെട്ടിട്ടാണ് സ്ഥാനാർഥിയായത്, പിന്നീട് പിന്മാറാൻ ആവശ്യപ്പെടുകയായിരുന്നു എന്ന് ബിന്ദു പ്രതികരിച്ചു.
കാസർഗോഡ് മുൻ ഡി.സി.സി. വൈസ് പ്രസിഡന്റ് ജെയിംസ് പന്തമാക്കനെ സസ്പെൻഡ് ചെയ്തു. ചാലക്കുടി എം.എൽ.എ. സനീഷ് കുമാർ ജോസഫിനെതിരെ ആരോപണം ഉന്നയിച്ച ഡി.സി.സി. ജനറൽ സെക്രട്ടറി ടി.എ. ആന്റോയ്ക്കും സസ്പെൻഷൻ ലഭിച്ചു.
അഞ്ച് വിമത സ്ഥാനാർഥികളെ കോൺഗ്രസ് പുറത്താക്കി. കുന്നമംഗലം ബ്ലോക്ക് പഞ്ചായത്തിലെ കാരശ്ശേരി ഡിവിഷനിൽ മത്സരിക്കുന്ന യൂത്ത് കോൺഗ്രസ് തിരുവമ്പാടി നിയോജകമണ്ഡലം പ്രസിഡന്റ് അഡ്വ. ദിശാലിനെ ആറ് വർഷത്തേക്ക് സസ്പെൻഡ് ചെയ്തു.
വിമതഭീഷണി ഉയർത്തിയ മഹിള കോൺഗ്രസ് നേതാവ് ജോയ്സി ജോസിനെ ഡി.സി.സി. ജനറൽ സെക്രട്ടറിയായി ഉയർത്തി പാർട്ടി ആശ്വാസ നടപടി സ്വീകരിക്കുകയും ചെയ്തു. അതേസമയം, കളമശ്ശേരി നഗരസഭയിലേക്ക് മത്സരിക്കുന്ന വിമതരെ സി.പി.എമ്മും പുറത്താക്കിയിട്ടുണ്ട്.