മലപ്പുറം: സംസ്ഥാനത്ത് വരാനിരിക്കുന്ന തദ്ദേശ തിരഞ്ഞെടുപ്പിൽ പാർട്ടി സ്ഥാനാർത്ഥികളെ നിർണയിക്കുന്നതിനുള്ള പാർലമെൻ്ററി കമ്മിറ്റികളിൽ യൂത്ത് ലീഗ് നേതാക്കളെ കൂടി ഉൾപ്പെടുത്താൻ മുസ്ലീം ലീഗ് നേതൃത്വം തീരുമാനിച്ചു. ഇത് സംബന്ധിച്ചുള്ള സർക്കുലർ സംസ്ഥാന ലീഗ് നേതൃത്വം പുറത്തിറക്കി.(Muslim League candidate selection, Youth League leaders also represented)
യൂത്ത് ലീഗ് സംസ്ഥാന ഭാരവാഹികളെയാണ് ജില്ലാ പാർലമെന്ററി കമ്മിറ്റികളിൽ ഉൾപ്പെടുത്തുക. സ്ഥാനാർത്ഥികളെ നിർണയിക്കുന്നതിനുള്ള മണ്ഡലം പാർലമെൻ്ററി കമ്മിറ്റികളിൽ യൂത്ത് ലീഗ് ജില്ലാ ഭാരവാഹികൾക്കും പ്രാതിനിധ്യം നൽകും.
സ്ഥാനാർത്ഥികളെ തിരഞ്ഞെടുക്കുന്നതിനും 'മൂന്ന് തവണ' മത്സരിച്ചവർക്ക് ഇളവ് നൽകുന്നതുമായ നിർണായക തീരുമാനങ്ങൾ എടുക്കുന്ന പാർലമെൻ്ററി കമ്മിറ്റികളിൽ നിന്ന് യൂത്ത് ലീഗ് ഭാരവാഹികളെ തുടക്കത്തിൽ ഒഴിവാക്കിയത് പാർട്ടിക്കുള്ളിൽ വലിയ പ്രതിഷേധത്തിന് കാരണമായിരുന്നു.
ഇതിനെത്തുടർന്ന് യൂത്ത് ലീഗ് ഭാരവാഹികൾ പാണക്കാട് സാദിഖലി തങ്ങളെ നേരിൽ കണ്ട് തങ്ങളുടെ പ്രാതിനിധ്യം കമ്മിറ്റികളിൽ ഉറപ്പാക്കണമെന്ന് ആവശ്യപ്പെട്ടു. ഈ ആവശ്യം അംഗീകരിച്ചാണ് ഇപ്പോൾ യൂത്ത് ലീഗിനെ ഉൾപ്പെടുത്തിക്കൊണ്ടുള്ള പുതിയ സർക്കുലർ സംസ്ഥാന ലീഗ് നേതൃത്വം ഇറക്കിയത്.