കൊല്ലം: സംസ്ഥാന ഭക്ഷ്യമന്ത്രി ജി.ആർ. അനിലിന്റെ ഭാര്യ ആർ. ലതാദേവി കൊല്ലം ജില്ലാ പഞ്ചായത്ത് തിരഞ്ഞെടുപ്പിൽ മത്സരിക്കും. സി.പി.ഐ. സ്ഥാനാർത്ഥിയായാണ് ലതാദേവി ജനവിധി തേടുന്നത്. ചടയമംഗലം ഡിവിഷനിൽ നിന്നാണ് ലതാദേവി മത്സരിക്കുക.(Minister GR Anil's wife is a candidate for Kollam District Panchayat)
സി.പി.ഐ. സംസ്ഥാന എക്സിക്യൂട്ടീവ് അംഗവും സി.പി.ഐ. ചടയമംഗലം മണ്ഡലം സെക്രട്ടറിയുമാണ് നിലവിൽ ലതാദേവി. ഇന്നലെ ചേർന്ന സി.പി.ഐ. ജില്ലാ കൗൺസിൽ യോഗത്തിലാണ് ഇത് സംബന്ധിച്ച ഔദ്യോഗിക തീരുമാനമുണ്ടായത്.
കൊല്ലം ജില്ലാ പഞ്ചായത്ത് പ്രസിഡന്റ് സ്ഥാനം ഇത്തവണ വനിതകൾക്കായി സംവരണം ചെയ്തിട്ടുള്ള സാഹചര്യത്തിൽ ലതാദേവിയുടെ സ്ഥാനാർത്ഥിത്വത്തിന് വലിയ രാഷ്ട്രീയ പ്രാധാന്യമുണ്ട്. ലതാദേവി വിജയിക്കുകയും ജില്ലാ പഞ്ചായത്ത് ഭരണം എൽ.ഡി.എഫിന് ലഭിക്കുകയും ചെയ്താൽ, ആദ്യ രണ്ടര വർഷം ലതാദേവി ജില്ലാ പഞ്ചായത്ത് പ്രസിഡന്റാകും എന്നാണ് സൂചന.