തിരുവനന്തപുരം: തദ്ദേശ സ്വയംഭരണ സ്ഥാപനങ്ങളിലേക്കുള്ള വോട്ടെണ്ണൽ ആരംഭിക്കുന്നതിന് തൊട്ടുമുമ്പ് തിരുവനന്തപുരം കോർപ്പറേഷനിലെ യുഡിഎഫ് മേയർ സ്ഥാനാർത്ഥി കെ.എസ്. ശബരീനാഥൻ പ്രശസ്തമായ പഴവങ്ങാടി ഗണപതി ക്ഷേത്രത്തിൽ ദർശനം നടത്തി. വിജയത്തിനായി പ്രാർത്ഥിച്ച അദ്ദേഹം, ക്ഷേത്രനടയിൽ തേങ്ങയുടച്ച് വഴിപാടുകൾ സമർപ്പിച്ചു.(KS Sabarinathan visits temple on vote counting day)
പോളിംഗ് ദിനത്തിൽ തങ്ങളുടെ ഭാഗത്തുനിന്നുണ്ടായ മികച്ച പ്രകടനത്തിന്റെ ആത്മവിശ്വാസം പ്രതിഫലിക്കുന്നതായിരുന്നു ശബരീനാഥൻ്റെ പ്രതികരണം. മാധ്യമങ്ങളോട് സംസാരിക്കുമ്പോൾ, കണക്കുകളിലേക്കും അവകാശവാദങ്ങളിലേക്കും കടക്കാതെ, യുഡിഎഫിന് നല്ല വിജയം ഉണ്ടാകുമെന്ന് അദ്ദേഹം ആത്മവിശ്വാസം പ്രകടിപ്പിച്ചു.
"നല്ല വിജയമുണ്ടാകുമെന്ന പ്രതീക്ഷയിലാണ് മുന്നോട്ട് പോകുന്നത്. കണക്കുകളോ അവകാശവാദങ്ങളോ ഇപ്പോൾ പറയുന്നില്ല. ജനവിധി യുഡിഎഫിന് അനുകൂലമാകും," ശബരീനാഥൻ പ്രതികരിച്ചു.
ശക്തമായ ത്രികോണ മത്സരം നടന്ന കോർപ്പറേഷനിൽ, മേയർ സ്ഥാനാർത്ഥി വിജയം ഉറപ്പിച്ച് ക്ഷേത്രദർശനം നടത്തിയത് അണികൾക്ക് ആവേശമായി.