111-ാം വയസിലും വോട്ട് ചെയ്ത് ജാനകി മുത്തശ്ശി : നഷ്ടപ്പെടുത്തിയിട്ടില്ല, ഒരൊറ്റ വോട്ടും! | Janaki

തൃശൂർ: പ്രായം വെറുമൊരു സംഖ്യ മാത്രമാണെന്ന് തെളിയിച്ച്, തൃശൂർ ജില്ലയിലെ ഏറ്റവും പ്രായം കൂടിയ വോട്ടറായ ജാനകി അമ്മ (111) ഈ തെരഞ്ഞെടുപ്പിലും തന്റെ കടമ നിർവഹിച്ചു. ജനാധിപത്യത്തിന്റെ ഉത്സവത്തിന് ആവേശം പകരാൻ ഊന്നുവടിയുടെ സഹായത്തോടെ പോളിങ് ബൂത്തിലെത്തി വോട്ട് രേഖപ്പെടുത്തിയ ഈ മുത്തശ്ശി, പുതുതലമുറയ്ക്ക് വലിയ പ്രചോദനമാണ്.(Janaki, an elderly woman, voted at the age of 111)

തൃശൂർ ജില്ലയിലെ പുത്തൂർ പഞ്ചായത്തിലെ 12-ാം വാർഡായ ചോച്ചേരിക്കുന്ന് വാർഡിലെ വോട്ടറാണ് ജാനകി. അഞ്ച് തലമുറയുടെ വളർച്ച കണ്ട ഈ മുതിർന്ന പൗരന് ഒരു തെരഞ്ഞെടുപ്പിലും വോട്ട് നഷ്ടപ്പെടുത്തിയിട്ടില്ല എന്ന അപൂർവ നേട്ടവുമുണ്ട്.

വോട്ട് ചെയ്യാൻ തുടങ്ങിയ കാലം മുതൽ ഇന്നുവരെ അമ്മ ഒരു തെരഞ്ഞെടുപ്പിലും വിട്ടുനിന്നിട്ടില്ലെന്ന് മക്കൾ സാക്ഷ്യപ്പെടുത്തുന്നു. കേൾവിക്ക് അൽപ്പം കുറവുണ്ടെങ്കിലും, മുത്തശ്ശിയുടെ അപാരമായ ഓർമ്മശക്തി ഏവരെയും അത്ഭുതപ്പെടുത്തുന്നതാണ്. ഓരോ കാലഘട്ടത്തിലെയും വോട്ടിങ് അനുഭവങ്ങൾ ഓർത്തെടുക്കാനും പങ്കുവെക്കാനും ഇവർക്ക് പ്രത്യേക താല്പര്യമാണ്.

111 വയസ് പിന്നിടുമ്പോഴും സ്വന്തം കാര്യങ്ങൾ ചെയ്യാൻ ജാനകി അമ്മയ്ക്ക് ആരുടെയും സഹായം ആവശ്യമില്ല. ജീവിതത്തിൽ ഇന്നേവരെ ആശുപത്രിയിൽ കിടക്കേണ്ടി വന്നിട്ടില്ല എന്നതും ആരോഗ്യപരമായ ഒരു അപൂർവതയാണ്. നടക്കാൻ അടുത്തിടെ അൽപ്പം ബുദ്ധിമുട്ടുണ്ട് എന്നതൊഴിച്ചാൽ മറ്റ് ആരോഗ്യപ്രശ്‌നങ്ങളൊന്നും മുത്തശ്ശിക്കില്ല. ഏഴു മക്കളുണ്ടായിരുന്ന ജാനകി അമ്മയ്ക്ക് ഇപ്പോൾ നാല് മക്കളാണ് ജീവിച്ചിരിപ്പുള്ളത്. ഇടതുപക്ഷ കുടുംബമാണ് തങ്ങളുടേതെന്നാണ് മക്കളുടെ അവകാശവാദം. ഏതാനും ദിവസം മുൻപ് റവന്യൂ മന്ത്രി കെ. രാജൻ നേരിട്ടെത്തി മുത്തശ്ശിയെ ആദരിച്ചിരുന്നു. ഒരൊറ്റ വോട്ടിന്റെ പോലും മൂല്യം വിളിച്ചോതുന്ന ജാനകി അമ്മയുടെ ഈ ആവേശം, ഓരോ പൗരനും തെരഞ്ഞെടുപ്പിന്റെ പ്രാധാന്യം എത്രത്തോളമുണ്ടെന്ന് ഓർമ്മിപ്പിക്കുന്നു.