തിരുവനന്തപുരം: രാഷ്ട്രീയാവേശം അലതല്ലിയ തദ്ദേശ തിരഞ്ഞെടുപ്പിന്റെ ആദ്യ ഘട്ട വോട്ടെടുപ്പ് നടക്കുന്ന ജില്ലകളിൽ സംസ്ഥാന സർക്കാർ പൊതു അവധി പ്രഖ്യാപിച്ചു. നാളെ, ഡിസംബർ 9-ന് പോളിംഗ് നടക്കുന്ന ഏഴ് ജില്ലകളിലാണ് അവധി ബാധകമാവുക.(First phase of local body elections, Public holiday declared in 7 districts tomorrow)
ഒന്നാം ഘട്ടത്തിൽ വിധി എഴുതുന്ന തിരുവനന്തപുരം മുതൽ എറണാകുളം വരെയുള്ള ജില്ലകളിലാണ് നാളെ പൊതു അവധി പ്രഖ്യാപിച്ചിട്ടുള്ളത്. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം എന്നിവയാണിവ. ഈ ജില്ലകളിലെ സർക്കാർ ഓഫീസുകൾക്കും വിദ്യാഭ്യാസ സ്ഥാപനങ്ങൾക്കും അവധിയായിരിക്കും.
വോട്ടെടുപ്പ് നടക്കുന്ന പ്രദേശങ്ങളിലെ വാണിജ്യ സ്ഥാപനങ്ങൾക്ക് വേതനത്തോടെയുള്ള അവധിയും പ്രഖ്യാപിച്ചിട്ടുണ്ട്. രണ്ടാം ഘട്ട വോട്ടെടുപ്പ് നടക്കുന്ന ഏഴ് ജില്ലകളിൽ വ്യാഴാഴ്ചയാണ് പൊതു അവധി. അവധി പ്രഖ്യാപിച്ച ജില്ലകൾ തൃശ്ശൂർ, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസർഗോഡ് എന്നിവയാണ്. ജനങ്ങൾക്ക് സമ്മതിദാനാവകാശം വിനിയോഗിക്കുന്നതിന് വേണ്ടിയാണ് രണ്ട് ഘട്ടങ്ങളിലായി പൊതു അവധി പ്രഖ്യാപിച്ചിരിക്കുന്നത്.