തിരുവനന്തപുരം: തിരുവനന്തപുരം നഗരസഭയിൽ സി.പി.എമ്മിന് വെല്ലുവിളിയായി വിമത സ്ഥാനാർത്ഥികളുടെ നിര വർധിക്കുന്നു. ഉള്ളൂർ വാർഡിൽ സി.പി.എം. ലോക്കൽ കമ്മിറ്റി അംഗമായ കെ. ശ്രീകണ്ഠനാണ് സ്വതന്ത്ര സ്ഥാനാർത്ഥിയായി മത്സരിക്കുന്നത്. ശ്രീകണ്ഠൻ 'ദേശാഭിമാനി' പത്രത്തിൻ്റെ തിരുവനന്തപുരം മുൻ ബ്യൂറോ ചീഫ് കൂടിയായിരുന്നു.(CPM rebel in Ulloor, K Sreekandan is an independent candidate)
തിരുവനന്തപുരം കോർപ്പറേഷനിൽ നിരവധി പേർ വിമതരായി മത്സരിക്കുന്നത് സി.പി.എമ്മിന് വലിയ വെല്ലുവിളിയാണ് ഉയർത്തുന്നത്. വിമത സ്ഥാനാർത്ഥികളെക്കുറിച്ചുള്ള ചോദ്യങ്ങളോട് പ്രതികരിച്ചുകൊണ്ട് പൊതുവിദ്യാഭ്യാസ മന്ത്രി വി. ശിവൻകുട്ടി രംഗത്തെത്തി. വലിയ രാഷ്ട്രീയ പാർട്ടികൾ ആകുമ്പോൾ ഇത്തരം ചില 'അപശബ്ദങ്ങൾ' ഉണ്ടാകുന്നത് സ്വാഭാവികമാണെന്നായിരുന്നു ഉള്ളൂരിലെ വിമത സ്ഥാനാർത്ഥിയെക്കുറിച്ചുള്ള അദ്ദേഹത്തിൻ്റെ പ്രതികരണം.
"അത് വലിയ ക്രൂരതയിലേക്ക് ഒന്നും പോകുന്നില്ല. വിമതർ ജനാധിപത്യം തുടങ്ങിയ അന്നുമുതൽ ഉണ്ട്. 101 സ്ഥാനാർത്ഥികളെ മാത്രമല്ലേ പ്രഖ്യാപിക്കാൻ കഴിയുകയുള്ളൂ. സീറ്റ് കിട്ടാത്ത ചിലർ ഇത്തരം വിമതരാകും." എങ്കിലും, ബി.ജെ.പി.യിൽ നടക്കുന്നതുപോലുള്ള കെടുതി സി.പി.എമ്മിൽ ഇല്ലെന്നും മന്ത്രി വി. ശിവൻകുട്ടി കൂട്ടിച്ചേർത്തു.