കോഴിക്കോട്: പ്ലസ് വണ് ഇമ്പ്രൂവ്മെന്റ് പരീക്ഷയില് ആള്മാറാട്ടം നടത്തിയ ബിരുദ വിദ്യാര്ഥിയെ അറസ്റ്റ് ചെയ്തു. പ്ലസ് വണ് വിദ്യാര്ഥിക്ക് പകരം ബിരുദ വിദ്യാര്ഥി പരീക്ഷ എഴുതുകയായിരുന്നു. ആള്മാറാട്ടത്തിന് ഉള്പ്പെടെയുള്ള വകുപ്പുകള് ചേര്ത്ത് കേസെടുത്ത് അറസ്റ്റ് രേഖപ്പെടുത്തി. നാദാപുരം കടമേരി ആര്എസി എച്ച്എസ്എസിലാണ് സംഭവം നടന്നത്.
ഇന്ന് നടന്ന ഇംഗ്ലീഷ് ഇമ്പ്രൂവ്മെന്റ് പരീക്ഷയ്ക്കിടെയാണ് പ്ലസ്വണ് വിദ്യാര്ഥിക്ക് പകരം ബിരുദ വിദ്യാര്ഥിയായ മുഹമ്മദ് ഇസ്മെയില് പരീക്ഷ എഴുതിയത്. ഹാള് ടിക്കറ്റില് കൃത്രിമം കാണിച്ചാണ് പരീക്ഷ എഴുതാനെത്തിയത്. സംശയം തോന്നിയ ഇന്വിജിലേറ്റര് പരിശോധന നടത്തിയപ്പോഴാണ് കൃത്രിമം നടന്നതായി കണ്ടെത്തിയത്. തുടര്ന്ന് പ്രിന്സിപ്പാളിനെയും പൊലീസിനെയും വിവരം അറിയിക്കുകയും നാദാപുരം പൊലീസ് എത്തി വിദ്യാര്ഥിയെ ചോദ്യം ചെയ്തതോടെയാണ് കൃത്രിമം നടന്നതായി സ്ഥിരീകരിക്കുകയുമായിരുന്നു. തുടര്ന്ന് ബിരുദ വിദ്യാര്ഥിയെ പൊലീസ് കസ്റ്റഡിയിലെടുത്തു.