കൊച്ചി: കേരള നിയമസഭാ തിരഞ്ഞെടുപ്പ് പ്രചാരണം കൊഴുക്കുന്നതിനിടെ ബിജെപി നേതൃത്വത്തെ പ്രതിക്കൂട്ടിലാക്കുന്ന വെളിപ്പെടുത്തലുമായിട്ടാണ് പ്രൊഫ. ടി.എൻ. സരസു രംഗത്തെത്തിയത് (Prof T.N. Sarasu). ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖറിനെതിരെയും അവർ രൂക്ഷവിമർശനം ഉന്നയിച്ചു. ഗുരുവായൂർ, കൊടുങ്ങല്ലൂർ മണ്ഡലങ്ങളിലെ പ്രചാരണ പരിപാടികളിൽ പങ്കെടുക്കാൻ താൽപ്പര്യം അറിയിച്ചിട്ടും പാർട്ടി നേതൃത്വം അത് നിരസിച്ചു. തന്നെ പ്രചാരണത്തിൽ നിന്ന് പോലും മാറ്റിനിർത്തുന്നത് അങ്ങേയറ്റം വേദനിപ്പിക്കുന്നുവെന്ന് അവർ പറഞ്ഞു.
താഴ്ന്ന ജാതിക്കാരെയും ദളിത് വിഭാഗങ്ങളെയും വോട്ടുബാങ്കിന് വേണ്ടി മാത്രമാണ് ബിജെപി ഉപയോഗിക്കുന്നത്. പാർട്ടിയിൽ കടുത്ത ജാതി വിവേചനം നിലനിൽക്കുന്നുണ്ടെന്നും സരസു ആരോപിച്ചു. ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖറിന് ‘ബിസിനസ് മൈൻഡ്’ മാത്രമാണുള്ളതെന്നും രാഷ്ട്രീയപരമായ സമീപനമല്ലെന്നും അവർ ചൂണ്ടിക്കാട്ടി.
നിയമസഭാ തിരഞ്ഞെടുപ്പിൽ സീറ്റ് നൽകാത്തതിൽ പരാതിയില്ലെങ്കിലും ദളിത് പ്രതിനിധികളോടുള്ള അവഗണന അംഗീകരിക്കാനാവില്ലെന്ന് സരസു വ്യക്തമാക്കി.
ഗുരുവായൂരിൽ അഡ്വ. ബി. ഗോപാലകൃഷ്ണനും കൊടുങ്ങല്ലൂരിൽ ട്വന്റി-20യുടെ ഡോ. വർഗീസ് ജോർജുമാണ് ഇത്തവണ എൻഡിഎ സ്ഥാനാർത്ഥികളായി മത്സരിക്കുന്നത്. ലോക്സഭാ തിരഞ്ഞെടുപ്പിൽ ആലത്തൂരിൽ ബിജെപിക്ക് വേണ്ടി പൊരുതിയ സരസുവിന്റെ ഈ വെളിപ്പെടുത്തൽ തിരഞ്ഞെടുപ്പ് വേളയിൽ ബിജെപിക്ക് വലിയ രാഷ്ട്രീയ തിരിച്ചടിയാകാൻ സാധ്യതയുണ്ട്.
Short Story Summary:
BJP leader Prof. T.N. Sarasu, the former Alathur Lok Sabha candidate, has raised serious allegations of caste discrimination within the party. She claimed that she was intentionally sidelined from the Assembly election campaigns in Guruvayur and Kodungallur despite her willingness to participate. Sarasu criticized BJP State President Rajeev Chandrasekhar for having a “business mindset” and accused the party of using Dalits only for votes while ignoring their concerns internally.
